In sa vida non est sceti a essi prexaus.

Sa cultura cosa nosta est impuntada cun sa biadìa, ma ita chi ddui est unu caminu prus apagnadori? La biadìa cument'arribat si ndi andat, narat sa scritrici Emily Esfahani Smith, ma a donai unu sensu a sa vida, chi serbat a cancuna cosa in prus de tui e chi ti ndi pesit su mellus de tui e totu, ti donat cancuna cosa po t'apoderai. Ascurtai a Smith chi si narat sa diferentzia fra essi prexaus e tenni sensu e si donat is pilastrus de una vida prena.

Mi pentzamu

ca s'iscopu de sa vida
fuet a circai sa biadìa.

Totus narànta ca sa 'ia
conc'a sa biadìa fuet s'arrennescida,

e duncas apu circau su traballu ideali,

su sposu ideali, sa domu ideali.

Perou intamus de m'intendi realizada

fuemu ansiada e afaltada.

E non fuemu a sola, is amigus mius
s'intendiant a sa propriu manera.

A s'accabada seu andada
a s'iscola de psicologia positiva

po imparai su chi serbit po essi prexaus.

Perou su chi apu iscobertu ingunis
m'at furriau sa vida.

Est dimostrau ca est a circai sa biadìa
ca fait sa genti trista.

E su chi apu iscobertu est:

su tassu de suicidiu
est crescendi in su mundu

e de pagu in America est arribau
a su massimu de 30 annus.

Mancai sa vida est diventendi
ogetivamenti mellus

de calisiat parti dda castis,

prus genti s'intendit disisperada,

depressa e a sola.

Unu tuvu est papendinci sa genti

e non depis essi maladiu de depressioni
po ddu cumprendi.

Un'orta in sa vida, pentzu
chi totus si domandeus:

Custu est totu su chi c'est?

E segundu sa ricerca,
su chi portat a custu disisperu

non est ca ddu amancat sa biadìa.

Ddu amancat cancun'atera cosa,

ddu amancat unu sensu in sa vida.

Ma custu m'at fatu benni a conca
unus cantu preguntas.

In sa vida ddu at de prus
chi a essi prexaus?

E cali est sa diferentzia
tra essi prexaus

e tenni unu sensu in sa vida?

Medas psicologus definint sa biadìa
cument'a un istadu de benessiri,

a s'intendi beni in su momentu.

Su sensu, perou, est prus a fundu.

Su psicologu famosu Martin Seligman narat

ca su sensu benit de su fatu de apartenni
e serbiri a cosas de prus de nosus e totu

e de svilupai su mellus a intru de nosus.

Sa cultura cosa nosta
est ossessionada de sa biadìa,

ma apu iscobertu ca a circai su sensu
donat prus cuntentu.

Is istudius amostant ca a chini tenit
unu sensu in sa vida

est prus resilienti,

est prus bravu a iscola e in su traballu,

e bivit fintzas de prus.

E duncas mi seu preguntada:

cumenti podeus bivi cun prus sensu?

Po dd'iscoberri apu intervistau
a centenas de personas po cinc'annus

e apu ligiu millantas paginas
de psicologia,

neuroscientzias e filosofia.

Ponendi totu a pari

apu iscobertu is cuatru pilastrus
de una vida prena de sensu.

E podeus creai vidas prenas de sensu

pesendi cancunu o totus cussus pilastrus
in sa vida cosa nosta.

Su pilastru de unu est s'apartenentza.

S'apartenentza benit de su fatu
de essi in d'unu acapiu

a ca ti istimant po cussu chi ses diaderus

e tui puru istimas is aterus.

Ma certus grupus o acapius
donant una forma pobera de apartenentza:

ses istimada po cussu chi creis,

po cussus chi odias,

non po cussu chi ses.

S'apartenenza diaderus
nascit de s'amori.

Bivit in is momentus fra is individuus,

e est uno scioberu -- podis scerai
de dda cultivai cun is aterus.

Si fatzu un esempiu.

Dognia mengianu, s'amigu miu Jonathan
comporat su giornali

de su propriu logu in New York.

Non est sceti una transatzioni, perou.

Si firmant a chistionai

e si trattant cument'a personas.

Ma un'orta, Jonathan
non teniat dinai in cambiu

e su giornalaiu dd'at nau:

"Non ti preocupisi".

Ma Jonathan boliat pagai

e est andau a sa butega po comprai
cancuna cosa chi non ddi serbiat

po tenni dinai in cambiu.

Ma candu at donau su dinai a su giornalaiu

issu s'est furriau.

Si nc'est agatau mali.

Boliat fai una cosa gentili,
ma Jonathan iat arrefudau.

Pentzu ca totus arrefudaus is aterus
chentz'e mancu si nd'acatai.

Deu eja.

Atobiu a cancunu chi connosciu
chentz'e mancu ddu biri.

Castiu su telefunu candu
canuncu chistionat cun mei.

Custas atzionis smenguant a is aterus.

Ddus faint intendi invisibilis e inutilis.

Ma candu ti donas cun amori
criasa un acapiu

chi ndi pesat a totus.

A genti meda, s'apartenentza
ddis donat su sensu prus mannu,

cussus acapius
cun sa famiglia e is amigus.

Po is aterus, su sensu benit
de su segundu pilastru: un'iscopu.

A agatai s'iscopu cosa tua
non est sa propriu cosa

de agatai su traballu chi ti donat gosu.

S'iscopu no est a disigiai,
est prus a donai.

Una guardiana de spidali m'at nau
ca s'iscopu cosa sua est a sanai sa genti.

Medas babus e mamas mi nanta:

"S'iscopu miu a est
a pesai a fillus mius".

Su fundamentu de s'iscopu est a imperai
is fortzas cosa tua po is aterus.

Certus, po medas de nosus
custu sutzedit cun su traballu.

Est aici chi pigaus parti
e s'intendeus utilis.

Ma bolit nai puru ca chistionis
cument'a no agatai su traballu,

a sa disocupatzioni,

a sa pagu pratecipatzioni
de is traballadoris,

non funt sceti problemas economicus,
ma funt puru esistentzialis.

Chentz'e cancuna cosa digna de fai

sa genti non bivit.

Certus, non si depit agatai
un iscopu in su traballu,

ma un iscopu ti donat
cancuna cosa chi ti fait bivi,

su "poita" chi ti fait andai a innantis.

Su pilastru de tres puru
cumportat chi ndi bessat de tui e totu,

ma in d'una manera diferenti:

sa trascendentza.

Is istadus trascendentis
funt cussus rarus momentus

chi ti scarescis de su trumbullu
de dognia diri,

s'axiori de tui e totu sparessit

e t'intendis acapiau
a una realidadi prus arta.

Una persona m'at nau ca sa trascendentza
ddi benit castiendi s'arti.

Po un'atera, est in cresia.

Po mimi, ca seu una scriidora,
benit scriendi.

A bortas, m'agatu in cussu logu a ca perdu
su sensu de su tempus e su spatziu.

Custas esperientzas trascendentalis
ti podint cambiai.

In d'unu studiu is studentis depiant
castiai una mata de ocalitu de 60 metrus

po unu minutu.

A pustis, si intendiant prus pagu
scientis de issus e totu

e fuent fintzas prus generosus
a s'ocasioni de agiudai a cancunu.

Appartenentza, iscopu, trascendentza.

Su pilastru de cuatru chi apu agatau

a su solitu meravigliat sa genti.

Su cuartu pilastru est a contai storias,

sa storia chi tui contas de tui e totu.

A contai su chi ti sutzedit
cument'a una storia ponit in craru,

ti fait a cumprendi cumenti
ses diventau su chi ses.

Ma non sempiri cumprendeus
ca nosus e totu seus is autoris

e ca podeus cambiai
sa manera de dda contai.

Sa vida non est una lista de acontessius.

Podeus curregi, interpretai
e torrai a nai sa storia cosa nosta,

mancai is acontessius siant is chi funt.

Apu connotu unu giovunu, Emeka,
chi s'est amarmurau gioghendi a football.

A pustis de s'incidenti, Emeka at nau:

"Sa vida mia fuet bella
gioghendi a football,

ma castiaimiri imoi".

Sa genti chi narat storias
cument'a custa --

"Sa vida mia fuet bella,
imoi est legia".--

tendint a essi prus apentzamentaus
e prus depressus.

E Emeka fuet aici po unu pagu de tempus.

Ma cun su tempus, at cumentzau
a tessi unu contu diferenti.

Su contu nou fuet:

"A innanti de s'incidenti
bivemu chentz'e un iscopu.

Fuemu festraxiu e egoista.

Ma s'incidenti m'at fatu pentzai
ca podemu essi un omini mellus".

Custa revisioni de su contu cosa sua
at cambiau sa vida de Emeka.

Cun su contu nou

Emeka at cumentzau a imparai a is pipius

e at iscobertu ca s'iscopu fuet

a serbiri is aterus.

Su psicologu Dan McAdams
ddu tzerriat "contu de redentzioni",

a ca su mali est redentu de su bonu.

Is chi bivint una vida prena de sensu,
at iscobertu,

si contant sa vida insoru

parendidda de redentzioni,
crescida e amori.

Ma ita est chi fait cambiai
is contus a sa genti?

Cancunu dd'agiudat unu terapista,
ma si podit fai a solus puru,

bastat a pentzai beni a sa vida,

a cumenti is esperientzas t'ant formau,

su chi as perdiu, su chi as guadangiau.

Custu est su chi at fatu Emeka.

Non as a cambiai su contu in d'una noti,

ci podint bolli annus
e poit essi dolorosu.

A s'acabada, eus sunfriu totus,
e totus tribuliaus.

Ma chi imprassas cussus amentos dolorosus
arribas a una visioni e una sabiesa noa

e agatas su bonu chi ti sustenit.

Apartenentza, iscopu,
trascendentza e a nai contus:

custus funt is quatru pilastrus
de su sensu de sa vida.

Candu fuemu giovuna

seu stetia aici fortunada de m'agatai
ingiriada de totu 'e is cuatru pilastrus.

Babu e mama teniant un centru sufi
in domu nosta in Montreal.

Su sufismu est una pratica spirituali
assotziada a is derviscius chi giranta

e a su poeta Rumi.

Duas bortas a sa cida is sufis
beniant a domu nosta

po meditai, bufai tei persianu
e contai istorias.

In sa pratica insoru depiant
puru serbiri totu sa creatzioni

cun atzionis de amori, mancai piticas.

Bollit nai a essi gentili fintzas
cun is chi t'ant ofendiu.

Custu ddi si onada un iscopu
po apoderai s'egoismu cosa insoru.

A s'acabada, mi ndi seu andada de domu
po andai a s'universidadi

e chentz'e su fundu cotidianu
de sufismu in sa vida mia

m'intendemu perdia.

E apu cumentzau a circai su chi serbit
po tenni una vida digna.

Custu m'at fatu cumentzai su biaji.

Castiendimiri a palas, cumprendu

ca sa domu sufi teniat diaderus
una cultura de sensu.

Is pilastrus fuent parti de s'architetura

e cussus pilastrus s'agiudànt
a bivi una vida prena.

Is proprius principius,
certus, si applicant

in ateras comunidadis fortis puru,

bonas e malas.

Ghengas, setas:

custas funt culturas de sensu
chi imperant is pilastrus

e donant a sa genti cancuna cosa
po bivi e po morri.

Ma custa est propriu s'arexioni
poita sa sotziedadi nosta

depit donai scioberus mellus.

Depeus pesai custus pilastrus a intru
de is famiglias e is istitutzionis nostas

po agiudai sa genti a essi
su mellus chi podint.

Ma a bivi una vida de sensu
est traballosu.

Est unu protzessu chi non acabat.

Criaus sa vida nosta dogna diri

aciungendi a su contu cosa nosta.

E a bortas s'atufaus.

Candu sutzedit a mei

pentzu a un'esperientza forti
chi apu tentu cun babu miu.

Medas mesis a pustis de sa laurea mia

babu at tentu un infartu aici terribili
chi nd'iat essi potziu morri.

Non est mortu e candu dd'apu preguntau

a ita iat pentzau
candu at castiau sa morti in faci,

at nau ca totu su chi at potziu pentzai
fuet ca depiat bivi

po agiudai a fradi miu e a mei

e custu dd'at donau sa fortza
de lutai po bivi.

Candu dd'anti fatu s'anestesia
po s'operatzioni de urgenza,

intambus de contai a torradura agoa de 10,

at ripitiu is nominis nostus
a tipu mantra.

Bolliat chi is nomins nostus fuessint
is urtimus fueddus chi iat essi nau

chi fuessit mortu.

Babu est maistu de linna e sufi.

Una vida umili,

ma una vida bona.

Corcau ingunis anant'e sa morti
teniat un'arrexoni po bivi:

s'amori.

Su sensu de apartenentza
a sa famiglia sua,

s'iscopu cument'a babu,

sa meditatzioni trascendenti,
a ripiti is nominis nostus --

custas, narat issu, funt
is cosas chi dd'anti fatu bivi.

Custu est su cuntu
chi si contat a issu e totu.

Custa est sa fortza de su sensu.

Sa biadìa cument'arribat si ndi andat.

Ma candu sa vida è bella diaderus,

o candu andat mali diaderus,

a tenni unu sensu ti onat
cancuna cosa po t'apoderai.

Grazias.

(Tzarracamanus)