انسانیت، شہرت، اور محبت کے بارے میں خیالات

"میں خواب بیچتا ہوں، اور میں کروڑوں لوگوں کو محبت فروخت کرتا ہوں۔" بالی وڈ کے سب سے بڑے ستارے شاہ رخ خان کہتے ہیں۔ اس دلکش، مزاحیہ گفتگو میں خان اپنی زندگی کے سفر کی کہانی سناتے ہیں، اپنا ایک مشہور ناچ دکھاتے ہیں اور شہرت کی زندگی اور مشکلات کے نتیجے میں ملی حکمت بانٹتے ہیں۔

نمسکار [سلام]

میں ایک فلمی ستارہ ہوں، میری عمر51 سال ہے،

اور اب تک بوٹوکس استعمال نہیں کرتا۔

(قہقہے)

تو میں صاف ہوں، لیکن میں اپنی فلموں میں
ایک 21 سالہ کا برتاو کرتا ہوں۔

ہاں، میں یہ کرتا ہوں۔

میں خواب بیچتا ہوں، اور اپنے گھر بھارت میں
کروڑوں لوگوں کو محبت فروخت کرتا ہوں

جو یہ سجمھتے ہیں کہ میں
دنیا کا بہترین عاشق ہوں۔

(قہقہے)

اگر آپ کسی کو نہ بتائیں، تو میں آپ کو
بتاوں کہ میں ایسا نہیں ہوں،

لیکن میں کبھی ایسا محسوس نہیں ہونے دیتا۔

(قہقہے)

مجھے یہ بھی یقین دلایا گیا ہے

کہ یہاں آپ میں سے بہت سے لوگوں نے
میرا کام نہیں دیکھا،

اور میں آپ کے لیے افسردہ ہوں۔

(قہقہے)

(تالیاں)

لیکن اس سے یہ حقیقت جھٹلائی نہیں جا سکتی
کہ میں مکمل طور پر خود پسند ہوں،

جیسا ایک فلمی ستارے کو ہونا چاہیے۔

(قہقہے)

تبھی میرے دوستوں کرس اور جولیٹ نے
مجھے یہاں دعوت دی

مستقبل کے "آپ" پر گفتگو کے لیے۔

قدرتی طور پر اس کا مطلب ہے کہ میں
آج کے "میں" پر بات کروں گا۔

(قہقہے)

کیونکہ میرا پختہ یقین ہے کہ انسانیت
کافی حد تک میرے جیسی ہے۔

(قہقہے)

ہاں ہاں ۔ یہ ہے۔

یہ ڈھلتی عمر کے فلمی ستارے جیسی ہے،

جو اپنے اردگرد کے نئے پن پر گرفت کرنے کی
کوشش کر رہا ہے،

سوچتا ہے کہ کیا اس نے شروع سے اسے
صحیح سمجھا ہے،

اور ابھی بھی راستے کی تلاش میں ہے

تاکہ وہ اپنی چمک برقرار رکھ سکے۔

میں انڈیا کے دارالحکومت نئی دہلی کی ایک
پناہ گزینوں کی آبادی میں پیدا ہوا۔

اور میرے والد آزادی کے ایک جنگجو تھے۔

جبکہ میری ماں صرف ایک جنگجو تھیں
جیسا کہ مائیں ہوتی ہیں۔

اورکافی حد تک قدیم انسانوں کی طرح،

ہم بقا کی جدوجہد کرتے تھے۔

جب میں 20 کی دہائی میں تھا،

تو میں نے اپنے والدین کو کھو دیا،

جو مجھے ماننا ہوگا بظاہر میری لاپرواہی تھئ،

لیکن --

(قہقہے)

مجھے وہ رات یاد ہے جب میرے والد فوت ہوئے،

اور مجھے ہمسائے کا وہ ڈرائیور یاد ہے جو
ہمیں پسپتال لے جا رہا تھا۔

وہ کچھ یوں بڑبڑایا
"مردے اچھی بخشش نہیں دیتے"

اور اندھیرے میں گم ہو گیا۔

تب میں صرف 14 سال کا تھا،

اور میں نے اپنے والد کے مردہ جسم کو
گاڑی کی پچھلی سیٹ پر ڈالا،

ماں میرے ساتھ بیٹھیں،

میں نے ہسپتال سے واپس گھر کی طرف
گاڑی چلانی شروع کر دی۔

اور خاموشی سے سسکنے کے دوران، میری ماں نے
میری طرف دیکھا اور انہوں نے کہا،

"بیٹا، تم نے گاڑی چلانی کب سیکھی؟"

میں نے اس کے بارے میں سوچا اور اندازہ ہوا،
اور میں نے اپنی ماں سے کہا،

"امی، ابھی ابھی۔"

(قہقہے)

تو پھر اس رات کے بعد سے،

کافی حد تک نوجوانی میں انسانیت کی طرح،

میں نے بقا کے اصلی طریقے سیکھے۔

اور سچی بات ہے اس وقت زندگی کی حکمت عملی
بہت زیادہ سادہ تھی۔

تو بس جو بھی ملا، کھا لیا

اور جو بھی آپ کو کہا گیا وہ کر دیا۔

میں سوچتا تھا 'سیلییک' ایک سبزی تھی،

اور 'وی گن' 'سٹار ٹریک' فلم کے کردار
مسٹر سپاکس کا گمشدہ ساتھی تھا۔

(قہقہے)

آپ نے اس لڑکی سے شادی کی جس سے
پہلی محبت بھری ملاقات ہوتی،

اور آپ کو تکنیکی آدمی سمجھا جاتا اگر آپ
اپنی گاڑی کا کاربوریٹر ٹھیک کرسکتے تھے۔

اور میں واقعی سمجھتا تھا کہ 'گے' انگریزی
میں خوشی کے لیے ایک مہذب لفظ ہے۔

اور "لیزبین" تو جیسے آپ سب جانتے ہی ہیں
پرتگال کا دارلخلافہ تھا۔

(قہقہے)

میں کہاں تھا؟

ہم نظاموں پر انحصار کرتے تھے

جو نسلوں کی مشقت اور قربانیوں کے بعد
بنائے گئے تھے

ہماری حفاظت کے لیے،

اور ہمیں لگتا تھا کہ حکومتیں حقیقت میں
ہماری بہتری کے لیے کام کرتی ہیں۔

سائنس سادہ اور منطقی تھی،

'سیب' ابھی تک صرف ایک پھل تھا

جو پہلے حوا اور پھر نیوٹن کی ملکیت تھا،

تب تک سٹیو جابز کے قابو میں نہیں آیا تھا۔

اور "یوریکا!" کی صدا آپ بلند کرتے تھے

جب آپ گلیوں میں ننگے بھاگنا چاہتے تھے۔

زندگی جہاں آپ کو کام کے لیے لے جاتی
آپ چلے جاتے،

اور زیادہ تر لوگ آپ کو خوش آمدید کہتے۔

ہجرت کی اصطلاح تب

سائیبیریا سے آئے پرندوں کے لیے تھی،
انسانوں کے لیے نہیں۔

سب سے اہم، آپ جو تھے وہ تھے

اور جو سوچتے وہ کہہ دیتے تھے۔

پھر20 کی دہائی کے آخر میں،

میں ممبئی جیسے وسیع و عریض شہر میں آ گیا،

اور میری ساخت،

نئی آرزوئیں لیتی صنعتی انسانیت کی طرح،

بدلنا شروع ہوگئی۔

اس نئی شہری اور پر کشش
بقا کے پیچھے بھاگتے ہوئے،

چیزیں ذرا مختلف نظر آنے لگیں۔

میں دنیا بھر سے آئے لوگوں سے ملا،

چہرے، نسلیں، اصناف، ساہو کار۔

کسی کی واضح تعریف کرنا مشکل ہو گیا۔

اس وقت کام آپ کی وضاحت کرتا تھا

ایک زبردست برابری سے،

اور سارے نظام مجھے
کم قابلِ اعتبار محسوس ہونے لگے،

اتنے مشکل کہ نا قابلِ بھروسہ

انسانیت کے تنوع کی طرح

اور انسان کی ترقی اور
آگے بڑھنے کی ضرورت کی طرح۔

خیالات زیادہ آزادی اور
تیزی کے ساتھ پھیل رہے تھے۔

اور میں انسانی ایجاد اور تعاون
کےمعجزاتی تجربوں سے گزرا،

اور اپنی تخلیق کے،

جب اس مشترکہ کوشش کے پیچھے وسائل ہوں،

جس نے مجھے شہرت کی بلندی پر لا کھڑا کیا۔

مجھے محسوس ہونا شروع ہوا کہ
میں پہنچ گیا ہوں،

اور ویسے، جب میں 40 سال کا ہوا،
تو میں واقعی ہواوں میں اڑ رہا تھا۔

میں ہر جگہ تھا۔

آپ کو معلوم ہے؟
میں نے تب تک 50 فلمیں کیں

اور 200 گانے،

اور مجھے ملائيشيا کے لوگوں
کی طرف سے خطاب ملا۔

مجھے فرانسیسی حکومت کی طرف سے اعلی ترین
شہری اعزاز دیا گیا،

جس کا نام ابھی تک میں بھرپور کوشش
کے باوجود ادا نہیں کر سکتا۔

(قہقہے)

میں معافی چاہتا ہوں فرانس اور اس کے لیے
آپ کا شکریہ فرانس۔

لیکن اس سے بھی بڑھ کر مجھے اینجلینا جولی
سے ملنے کا موقعہ ملا --

(قہقہے)

تقریباً ڈھائی سیکنڈ کے لیے۔

(قہقہے)

اور پکی بات ہے کہ اس کو بھی یہ ملاقات
یاد ہو گی۔

اچھا، ہو سکتا ہے نہ ہو۔

اور ایک گول میز عشائیے پر میں
ھینا مونٹانا کے ساتھ بیٹھا

جو زیادہ وقت میری طرف پیٹھ کیے بیٹھی رہی۔

جیسے کہ میں نے کہا کہ میں اڑ رہا تھا،
ملی سے جولی تک،

اور انسانیت میرے ساتھ پرواز کر رہی تھی۔

ہم دونوں دراصل کافی حد تک
تندی و تیزی سے اڑ رہے تھے۔

اور پھر آپ سب جانتے ہیں کہ کیا ہوا۔

پھر انٹرنیٹ آ گیا۔

میں 40 کی دہائی کے آخر میں تھا،

اور میں نے 'چہچہانا' شروع کیا
پنجرے میں قید کینری کی طرح

اس تصور کے ساتھ کے
لوگ جو میری دنیا میں جھانک رہے ہیں

اس کی تعریف کریں گے

ایک معجزے کے جس کے ہونے کا
مجھے یقین ہے۔

مگر کچھ اور تھا جومیرا
اور انسانیت کا منتظرتھا

ہم توقع کر رہے تھے کہ
خواب اور خیالات وسیع ہو جائیں گے

دنیا میں رابطوں میں بہتری کے ساتھ ۔

ہم نے ناتراشیدہ سوچوں کے حصار
کے لیے جستجو نہیں کی تھی،

فیصلوں کے لیے، وضاحت کے لیے

جو اسی جگہ سے پھوٹتی ہے

جہاں سے آزادی اور انقلاب جنم لے رہے تھے۔

سب کچھ جو میں نے کہا
اس نے ایک نیا معنی لے لیا۔

جو بھی میں نے کیا -- اچھا، برا، بھونڈا --

وہ دنیا کے لیے تھا کہ وہ اس پر
تبصرے کرے اور اس کا مواخذہ کرے۔

درحقیقت، جو بھی میں نے نہیں کہا یا کیا

اس کا بھی یہی حشر ہوا۔

چار سال پہلے

میری پیاری بیوی گوری اور میں نے فیصلہ کیا
کہ ہمارا تیسرا بچہ ہونا چاہیے۔

اس کے بارے میں انٹرنیٹ پر دعویٰ کیا گیا

کہ وہ ناجائز بچہ تھا

ہمارے پہلے بچے کا

جو خود 15 سال کا تھا۔

بظاہر، وہ اس کی نوجوانی کی ایک حماقت کا
نتیجہ تھا جو اس نے ایک لڑکی سے کی تھی

رومانیہ میں گاڑی چلاتے ہوئے۔

اور ہاں، اس کے ساتھ اس واقعے کی ایک
جعلی ویڈیو بھی تھی۔

اور ہم ایک خاندان کی حثیت سے
سخت پریشان تھے۔

میرا بیٹا جو اب 19 سال کا ہے،

اب بھی جب آپ اسے "ہیلو" کہتے ہیں،

وہ مڑتا ہے اور کہتا ہے،

"لیکن بھائی، میرے پاس تو یورپی
ڈرائیونگ لائسنس ہی نہیں ہے۔"

(قہقہے)

ہاں۔

اس نئی دنیا میں،

آہستہ سے، حقیقت مجازی بن گئی اور
مجازی حقیقت بن گیا،

اور مجھے محسوس ہونے لگا

کہ میں وہ نہیں جو میں بننا چاہتا تھا یا
یوں کہیے جو میں نے سوچا تھا،

اور اس وقت انسانیت

بالکل میرے جیسی تھی۔

میرا خیال ہے کہ ہم دونوں ادھیڑ عمری کے
بحران کا سامنا کر رہے تھے،

اور انسانیت میری طرح ایک بے قابو
شتر بے مہار بن رہی تھی۔

میں نے سب کچھ بیچنا شروع کر دیا،

بالوں کے تیل سے لے کر ڈیزل جنریٹر تک۔

انسانیت سب کچھ خرید رہی تھی

خام تیل سے لے کر نیوکلیائی ری ایکٹر تک۔

آپ جانتے ہیں میں نے جسم سے چپکے ہوئے کپڑے
پہنا ہوا سپر ہیرو بننے کی بھی کوشش کی

اپنے آپ کو نئے سرے سے دریافت کرنے کے لیے۔

مجھے اعتراف کرنا چاہیے کہ
میں بری طرح ناکام ہوا۔

اور چپکے چپکے سے کہنا چاہوں گا
تمام سپائیڈر مین، بیٹ مین کی طرف سے

اور سپر مین جو اس دنیا میں ہیں،

آپ کو ان کی تعریف کرنی چاہیے،

کیونکہ اس سپر ہیرو کے کپڑوں میں
زیرِ ناف بہت درد ہوتی ہے۔

(قہقہے)

میں سچ کہہ رہا ہوں۔
یہاں یہ بات آپ کو بتانی ضروری تھی۔

سچ میں۔

اور حادثاتی طور پر میں نے
ایک نیا ناچ ایجاد کیا

جو مجھے پتہ نہیں چلا اور یہ
بہت مقبول ہو گیا۔

تو اگر یہ مناسب ہے،

اور آپ نے مجھے کچھ دیکھا ہے میں کافی
بے شرم ہوں تو میں آپ کو دکھاتا ہوں

اسے لنگی ناچ کہا جاتا تھا۔

تو اگر یہ مناسب ہے تو میں آپ کو
دکھاتا ہوں۔ ویسے میں باصلاحیت ہوں۔

(تحسین کی آوازیں)

تو یہ کچھ اس طرح ہوتا ہے۔

لنگی ناچ۔ لنگی ناچ۔ لنگی ناچ۔ لنگی ناچ۔

لنگی ناچ۔ لنگی ناچ۔ لنگی ناچ۔ لنگی ناچ۔

لنگی ناچ۔ لنگی ناچ۔ لنگی ناچ۔ لنگی۔

بس یہی ہے۔ یہ خاصا مقبول ہو گیا تھا۔

(تحسین کی آوازیں)

یہ واقعی ہوا۔

جیسا کہ آپ نے دیکھا کہ کسی کو کچھ سمجھ
نہیں آتا کہ کیا ہو رہا ہے سوائے میرے

اور واقعی اس سے کوئی فرق نہیں پڑتا،

کیونکہ ساری دنیا، اور ساری انسانیت،

میری طرح الجھن میں اور کھوئی ہوئی تھی۔

میں نے تب ہار نہیں مانی۔

میں نے سماجی میڈیا ہر اپنی شناخت
دوبارہ بنانے کی کوشش کی

جیسے ہر شخص کرتا ہے۔

میں نے سوچا اگر میں فلسفیانہ ٹویٹ کروں

لوگ سوچیں گے کہ میں زبردست ہوں،

لیکن کچھ جوابات جو مجھے ٹویٹس کے ملے

ان میں کچھ انتہائی الجھا دینے والے
مخففات تھے۔ آپ جانتے ہیں؟

آر او یف ایل، ایل او ایل۔

"ایڈیڈاس"، کسی نے میری ایک سوچ و بچار پر
مائل کرنے والی ایک ٹویٹ کے جواب میں لکھا

اور میں حیران تھا کہ آپ ایک جوتے کا نام
کیوں لکھیں گے،

میرا مطلب ہے کہ آپ ایک جوتے کا نام
مجھے کیوں لکھ بھیجیں گے؟

میں نے اپنی سولہ سالہ بیٹی سے پوچھا اور
اس نے مجھے بتایا۔

"ایڈیڈاس" کا اب مطلب ہے
"آل ڈے آئی ڈریم اباوٹ سیکس۔"

(قہقہے)

واقعی۔

میں نہیں جانتا اگر آپ کو پتہ ہے۔

تو میں نے واپس جواب میں مسٹر ایڈیڈاس
کو بڑے الفاظ میں لکھا، "ڈبلیو ٹی ایف",

دل میں شکر کرتے ہوئے کہ کچھ چیزیں اور
مخففات کبھی نہیں بدلیں گے۔

ڈبلیو ٹی ایف۔

لیکن یم یہاں ہیں۔

میں 51 سال کا ہوں،
جیسے میں نے آپ کو بتایا ہے،

ذہن کو ماؤُف کرنے والے مخففات کے باوجود،

میں آپ کو صرف یہ بتانا چاہتا ہوں

اگر انسانیت کے وجود کے لیے
کوئی اہم وقت ہے،

تو وہ اب ہے،

کیونکہ آج کے آپ بہادر ہیں۔

آج کے آپ پر امید ہیں۔

آج کے آپ اختراع پسند اور باوسائل ہیں،

اور یقیناً آج کے آپ غصہ دلانے کی حد تک
نہ سمجھ میں آنے والے ہیں۔

اور اس مسحور کن،

وُجُودیت کے نا مکمل لمحے میں،

کچھ بہادری محسوس کرتے ہوئے
یہاں آنے سے بالکل پہلے،

میں نے اپنے چہرے پر
ایک مکمل نظر ڈالنے کا فیصلہ کیا۔

اور مجھے احساس ہوا کہ میں اور
زیادہ ملنے لگا ہوں

مادام تساؤ کے عجائب گھر میں رکھے
اپنے مومی مجسمے سے۔

(قہقہے)

اور ہاں، احساس کے اس لمحے میں،

میں نے اپنے آپ سے اور انسانیت سے
سب سے موزوں سوال پوچھا:

کیا مجھے اپنی شکل درست کرنے کی ضرورت ہے؟

سچ میں۔ میں ایک اداکار ہوں،
جیسا میں نے آپ کو بتایا،

انسانی تخلیق کا ایک جدید اظہار۔

جس سرزمین سے میں آیا ہوں

وہ ناقابلِ بیان لیکن بہت سادہ روحانیت کا
سر چشمہ ہے۔

اپنی حد سے زیادہ فیاضی میں،

انڈیا نے کسی طرح فیصلہ کیا

کہ میں، ایک قلاش آزادی کے سپاہی کا
مسلمان بیٹا

جس نے حادثاتی طور پر خواب بیچنے کے
کاروبار میں قسمت آزمائی کی،

وہ اس کا رومانی بادشاہ بن جائے گا،

"بالی وڈ کا بادشاہ"،

سب سے بڑا عاشق
جو اس ملک میں کبھی بھی آیا ...

اس شکل کے ساتھ ۔

جی ہاں۔

(قہقہے)

جس کو متبادل طور پر بد صورت، غیر روایتی
کہا گیا

اور حیران کن طور پر زیادہ چاکلیٹی نہیں۔

(قہقہے)

اس قدیم سرزمین کے لوگوں نے

اپنے بے پناہ پیار میں مجھے سمو لیا،

اور میں نے ان لوگوں سے سیکھا

کہ نہ طاقت اور نہ غربت

آپ کی زندگی کو مزید سحر انگیز بنا سکتی ہے

یا کم پیچیدہ۔

میں نے اپنے ملک کے لوگوں سے سیکھا ہے

کہ ایک زندگی کا وقار،

ایک انسان، ایک ثقافت، ایک مذہب، ایک ملک

اصل میں بستا ہے

اس کی نفاست اور غم گساری میں۔

میں نے سیکھا ہے جو چیز بھی
آپ میں جوش پیدا کرے،

جو بھی آپ کو تخلیق کرنے یا
تعمیر پر ابھارے،

جو بھی آپ کو ناکام ہونے سے روکے،

جو بھی آپ کی بقا میں آپ کی مدد کرے،

وہ شاید انسانیت کا سب سے پرانا اور سادہ
جذبہ ہے،

اور وہ ہے پیار۔

میری سرزمین کے ایک صوفی شاعر کا
مشہور کلام،

(ہندی میں نظم سناتے ہیں)

(نظم ختم ہوتی ہے)

اس کا ترجمہ کچھ یوں ہے کہ جو بھی --

ضرور، اگر آپ ہندی جانتے ہیں
تو تالیاں بجائیں۔

(تالیاں)

یہ یاد رکھنا کافی مشکل ہے۔

اس کا ترجمہ کچھ اس طرح بنتا ہے

کہ علم کی وہ تمام کتابیں جو شاید آپ پڑھیں

اور پھر جائیں اور اپنا علم پھیلائیں

ایجادات سے، تخلیق سے، ٹیکنالوجی سے،

لیکن انسانیت اپنے مستقبل کے متعلق کبھی بھی
سمجھدار نہیں ہو گی

جب تک یہ اپنے اندر دوسرے انسانوں کے لیے
پیار اور غم گساری نہ پیدا کرے۔

ڈھائی حرفوں سے بنا یہ لفظ، "پریم،"

جس کا مطلب ہے "محبت،"

اگر آپ اس کو سمجھ جاتے ہیں

اور اس پر عمل کرتے ہیں،

یہ بذاتِ خود انسانیت کی
روشن خیالی کے لیے کافی ہے۔

تو مجھے مکمل یقین ہے کہ مستقبل کے "آپ" کو

ایسا ہونا چاہیے جو پیار کرے۔

ورنہ اس کا پھلنا پھولنا رک جائے گا۔

یہ اپنی ذات میں محو ہو کر فنا ہو جائے گا۔

تو آپ چاہے طاقت استعمال کریں

دیواریں بنانے کے لیے

اور لوگوں کو باہر رکھنے کے لیے،

یا آپ اسے رکاوٹیں توڑنے کے لیے استعمال
کریں اور انہیں اندر خوش آمدید کہیں۔

آپ چاہیں تو اپنے عقیدے کو استعمال کریں

لوگوں کو ڈرانے کے لیے

اور ان کو خوفزدہ کر کے
اطاعت پر مجبور کریں،

یا آپ اسے استعمال کر سکتے ہیں
لوگوں کو ہمت دلانے کے لیے

تاکہ وہ انسانی روشن خیالی کی اعلی ترین
سطح تک پہنچ سکیں۔

آپ اپنی توانائی کو استعمال کر سکتے ہیں

نیوکلیائی بم بنانے کے لیے اور اندھیرا اور
تباہی پھیلانے کے لیے،

یا آپ اسے استعمال کر سکتے ہیں کروڑوں
لوگوں تک خوشی کی روشنی پھیلانے کے لیے۔

آپ چاہیں تو سمندروں کو لاپرواہی سے گندا
کر دیں اور سارے جنگل کاٹ دیں۔

آپ ماحولیات کو تباہ کر سکتے ہیں،

یا پھر پیار سے توجہ دے کر

پانیوں سے اوردرختوں سے نئی زندگی
پیدا کر سکتے ہیں۔

آپ مریخ پر اتر سکتے ہیں

اور مسلح قلعے تعمیر کر سکتے ہیں،

یا پھر آپ زندگی کی انواع و اقسام تلاش
کر سکتے ہیں تاکہ سیکھیں اور تعظیم کریں۔

اور آپ وہ سارے پیسے جو ہم سب نے مل کر
کمائے ہیں وہ استعمال کر سکتے ہیں

لا حاصل جنگیں شروع کرنے میں

اور چھوٹے بچوں کے ہاتھوں میں
بندوقیں تھمانے میں

تاکہ وہ ایک دوسرے کو مار سکیں،

یا پھر اسے استعمال کر سکتے ہیں

مزید خوراک اگانے میں

تاکہ ان کے پیٹ بھر سکیں۔

میرے ملک نے مجھے سکھایا ہے

کہ ایک انسان کی پیار کرنے کی صلاحیت
جڑی ہوئی ہے خدا ترسی سے۔

یہ ایسی دنیا میں روشنی پھیلاتی ہے

جہاں تہذیب کے ساتھ، میرے خیال میں،
پہلے ہی بہت ردوبدل ہو چکی ہے۔

پچھلے کچھ دنوں میں، یہاں جو گفتگو ہوئی،
شاندار لوگ جو

آئے اور اپنے ہنر دکھائے،

اپنی انفرادی کامیابیوں کے بارے میں بات کی،
ایجادات، ٹیکنالوجی،

سائنس، علم جو یہاں ہونے کی وجہ سے
ہم حاصل کر رہے ہیں

ٹیڈ گفتگو کی موجودگی اور آپ سب

کافی وجوہات ہیں کہ ہم
مستقبل کے "ہم" کا جشن منائیں۔

لیکن اس جشن میں

ہمارے پیار اور غم گساری کی صلاحیت
کے بڑھاوا دینے کی جستجو کو

اپنے آپ کو منوانا ہو گا،
اپنے آپ کو منوانا ہو گا،

اس کے ساتھ ساتھ۔

تو مجھے یقین ہے کہ مستقبل کے "آپ"

لا محدود ہیں۔

اسے انڈیا میں چکرا کہتے ہیں، دائرے جیسا۔

یہ اپنے آپ کو مکمل کرنے کے لیے وہاں ختم
ہوتا ہے جہاں سے شروع ہوتا ہے۔

آپ جو وقت اور خلا کو
مختلف انداز سے سمجھتے ہیں

دونوں کو سمجھتے ہیں

آپ کی ناقابلِ تصور

اور شاندار اہمیت

اور کائنات کے اس بڑے تناظر میں
آپ کا مطلق غیر اہم ہونا.

آپ جو واپس لوٹتے ہیں

انسانیت کی اصل معصومیت کی طرف،

جو دل کی گہرائیوں سے پیار کرتی ہے،

جو سچائی کی آنکھ سے دیکھتی ہے،

جو ایک خالص دماغ کی روشنی میں
خواب دیکھتی ہے۔

مستقبل کے "آپ" کو ایک

ڈھلتی عمر کے فلمی ستارے کی طرح ہونا چاہیے

جسے یہ یقین دلایا گیا ہے کہ یہ امکان ہے کہ

ایسی دنیا جو مکمل طور پر،

پوری، اپنی ذات میں محو ہو کر

اپنے آپ سے پیار کرتی ہو۔

ایک دنیا -- حقیقت میں، یہ آپ پر ہے

کہ ایسی دنیا بنائیں

جو اپنی سب سے بڑی عاشق ہو۔

خواتین و حضرات، میرا یقین ہے کہ

مستقبل کے "آپ" کو ایسا ہونا چاہیے۔

آپ کا بہت شکریہ۔

شکریہ۔

(تالیاں)

شکریہ۔

(تالیاں)

شکریہ۔

(تالیاں)