OTP Learning Series 04: Como traducir

Este tutorial recolle unhas poucas pautas usuais de tradución para os voluntarios do Open Translation Project de TED.

Para acceder á versión ampla da guía de tradución que se menciona no vídeo cómpre ir a http://translations.ted.org/wiki/How_to_Tackle_a_Translation

Este vídeo foi creado por voluntarios do Open Translation Project de TED. Trátase dunha iniciativa que difunde as TED Talks máis alá da comunidade angloparlante, elaborando subtítulos, transcricións interactivas e posibilidade de que calquera charla poida ser traducida por voluntarias e voluntarios de todo o mundo.
Para máis información pódese consultar http://www.ted.com/participate/translate

[Como traducir]

Case todos cren que traducir é
unha arte que se aprende practicando.

Se cadra é certo,

pero, aínda así, hai algunhas regras
que podes seguir.

Se tivera que darche un consello
sobre isto, sería:

«Non traduzas nunca as palabras,
traduce sempre o sentido».

Primeiro, asegúrate de entender

todas as palabras, os termos e
as referencias culturais do orixinal.

E se cómpre investigar, faino.

E despois, esquece as palabras,

e tenta imaxinar como o diría
espontaneamente o orador

se fose falante nativo do teu idioma

e quixese transmitir a mesma mensaxe.

Velaquí algúns consellos máis específicos

derivados do lema
«nunca as palabras, sempre o sentido».

Non te apures!

Tes 30 días para traducir,

así que gasta o tempo necesario
para asegurarte de que todo é correcto.

Tenta transmitir o estilo do orador.

Isto implica traducir as bromas
e o sentido do humor,

o que é importante sobre todo
se despois se oen risos,

porque quen vexa a charla quere saber
por que se ri o público.

Non traduzas literalmente
as expresións idiomáticas.

Son frases feitas ou grupos verbais
que expresan unha idea en conxunto.

Un exemplo sería a expresión
«at the drop of a hat».

Non deberías traducilo como «o momento
en que se deixa caer un chapeu»,

senón que terías que traducir
o sentido da expresión.

O equivalente de «at the drop of a hat»
máis natural na túa lingua

pode non ser unha expresión idiomática,

senón unha palabra como «decontado»
ou a expresión «sen dubidalo».

E está perfecto así!

Non inventes as túas propias traducións
de terminoloxía especializada.

Os termos son palabras e expresións
usadas en áreas especializadas do saber.

Cómpre estarmos atentos aos termos,

como nomes de aparellos
ou procesos científicos ou económicos...

E, no canto de usares unha tradución
creada por ti mesmo,

asegúrate de buscar o equivalente
que se use normalmente no teu idioma.

É algo semellante ao
das expresións idiomáticas.

Por exemplo, cando atopes
un termo como «root folder»,

no canto de traducilo como
«un directorio con raíces»,

debes asegurarte de entender
ben o seu significado

e despois podes buscar

artigos ou webs que falen do concepto
ao que «root folder» se refire.

Deste xeito, poderás atopar

o equivalente real do termo na túa lingua.

Outra cousa que debes lembrar é:
«se fai falta, condensa».

Cando se traballa con subtítulos,

moitas veces cómpre condensar
ou reducir o texto

para manter unha velocidade
de lectura adecuada.

Tamén has ter que pensar

en cousas como dividir
un subtítulo en dúas liñas

sen deixar separado o sintagma.

Pero hai outros titoriais que falan diso.

E por suposto, non esquezas
os aspectos puramente lingüísticos,

como a gramática ou a puntuación.

Cando acabes,
mira outra vez a charla cos subtítulos

para darlle unha última corrección

e despois entrégaa para que a revisen.

Se te atascas,

vai á páxina do teu idioma na OTPedia

para atopar recursos
específicos para a túa lingua

e busca axuda e ideas no
grupo de Facebook do teu idioma.

Se che dá o bloqueo do tradutor,

lembra que formas parte dunha comunidade.

Para atopar máis consellos de tradución,
le esta guía na OTPedia.

E nada máis polo momento.
Boa transcrición e boa tradución!