A nova ciencia das vacinas personalizadas

Na intersección da medicina de precisión e a vacinoloxía atopamos unha investigación científica revolucionaria: as vacinas personalizadas. Ofer Levy, especialista en enfermidades infecciosas, presenta este prometedor enfoque médico, no cal as vacinas personalizadas poderían contrarrestar as mutacións que fan tan perigosas as enfermidades, e explícanos como agora comezamos unha nova era no mantemento e apoio á vida humana.

É difícil esaxerar os efectos beneficiosos
da inmunización.

Segundo os Centros para o Control
de Enfermidades dos EEUU,

entre os nenos estadounidenses
nacidos nos últimos 20 anos,

as vacinas evitarán
máis de 322 millóns de enfermidades,

máis de 21 millóns de hospitalizacións

e máis de 730.000 mortes,

aforrándolle á sociedade
case 1,4 billóns de dólares en custos.

Falamos de cifras grandes.

Pero agora ímonos centrar nun exemplo
en particular.

As vacinas case eliminaron xa

unha infección bacteriana chamada
Haemophilus influenzae.

Esta bacteria adoitaba infectar a pequenos
causando infeccións

da corrente sanguínea,

pneumonía, meninxite, morte

ou discapacidade permanente.

Vin algúns casos cando era
un pediatra novo.

Probablemente vós nunca oístes falar
desta enfermidade,

xa que as vacinas foron moi eficaces.

Podedes ver no gráfico da dereita

que desde a introdución das vacinas,

a incidencia de infeccións bacterianas
por Haemophilus

caeu de súpeto e case desapareceu.

Así que xeralmente as vacinas
son historias de éxito.

Pero tamén afrontamos retos.

Por exemplo, para a maioría das vacinas
precisamos dar múltiples doses

para lograr a protección ou mantela.

A comunidade científica traballa
en desenvolver vacinas de dose única.

Imaxina que recibes soamente unha vacina
da gripe en toda a túa vida

e que non fixese falta a vacina da gripe
estacional.

É difícil conseguir inmunidade
no caso de certos microbios.

Un exemplo clásico é o virus
de inmunodeficiencia humana, ou VIH.

Cómpre unha vacina con urxencia,
hai xa progresos na investigación

pero non a temos aínda.

Agora mesmo, outro elemento clave
na investigación das vacinas

é optimizar as vacinas
para os máis vulnerables,

os moi novos e as persoas maiores.

E esta é unha área de estudio activa.

Finalmente, un dos maiores retos
que enfrontamos agora mesmo

son as actitudes antivacinas.

De feito, é alarmante que máis de 100.000
bebés e nenos en EEUU

non recibisen ningunha vacina,

e ese número está a medrar.

A Organización Mundial da Saúde, ou OMS,

declarou as actitudes antivacinas

como unha das 10 ameazas máis importantes
para a saúde humana

no mundo hoxe en día.

Este gráfico ilustra a difusión
do sentimento antivacinas

no estado de California,

desde o 2000 ata o 2013,

mirando a porcentaxe
de alumnado de garderías públicas

que piden quedar exentos de vacinarse.

O sentimento antivacinas está en aumento

e ten consecuencias moi reais.

Pode que moitos de vós coñezades

que estamos a ver de novo infeccións
que pensabamos

que xa venceramos,

coma brotes de sarampelo
en moitos estados dos EEUU.

E moitos esquecéronse,

pero o sarampelo
é moi infeccioso e perigoso.

Bastan unhas poucas partículas virais
para infectar un individuo.

E incluso houbo informes

de que en eventos deportivos
e nun estadio olímpico

o virus pode viaxar longas distancias
polo aire

e infectar unha persoa vulnerable
na multitude.

Se agora tivese o sarampelo
e tusise,

(tose)

alguén na parte de atrás deste auditorio
podería infectarse.

E isto ten consecuencias moi reais.

Hai só uns meses,

unha azafata dunha liña aérea
contraeu o sarampelo nun voo,

o virus entroulle no cerebro,
causoulle encefalite,

e morreu.

Así que hai xente que está a morrer
debido a este sentimento antivacinas.

Quero adicar uns minutos

a dirixirme a aqueles
que non cren en vacinas

e que se resisten ás vacinas.

Como pediatra que recibe
unha vacina anual da gripe,

como pai de tres nenos

vacinados segundo o programa recomendado,

e como consultor de enfermidades
infecciosas pediátricas

que atendeu a nenos con meninxite,

evitable se os pais aceptasen
que fosen vacinados,

para min, esto é un asunto persoal.

Vexamos quen vai pagar o prezo

se lle damos a volta á cantidade
de vacinados na nosa sociedade.

Este gráfico amosa no eixe Y

o número de persoas que morren
por infección no mundo.

E no eixe X,

a idade dos que están a morrer.

E como podedes ver, a distribución
ten forma de U,

particularmente duro nos moi novos.

Así que as vacinas protexen da infección
aos moi cativos.

E se queremos falar, amigos meus,
sobre o que causan as vacinas,

porque hai moitas especulacións,

especulacións infundadas en internet,
sobre o que causan as vacinas,

as vacinas causan que haxa adultos, vale?

Isto é o que causan.

E a outra cousa que causan
é que a xente maior viva máis tempo.

Porque están protexidos da gripe

e outros asasinos de anciáns.

Agora falemos un pouco

de como podemos mellorar
as vacinas aínda máis.

Podemos crear vacinas para inmunizar
a aqueles máis vulnerables

e quizais incluso vacinas
dunha única dose.

Falemos un pouco de inmunoloxía.

No panel superior, o que ves
é unha simple vacina.

Todas as vacinas conteñen
algo chamado antíxeno.

O antíxeno é coma unha peza dun xerme,
dun microbio,

que o teu corpo lembra, vale?

E forma anticorpos, e os anticorpos
poden protexerte.

Así que este tipo de vacinas poder inducir
unha resposta inmune,

pero como podes ver aquí,

esa resposta inmune tende a subir
e baixar,

e precisas outra dose, e outra máis

para manter a protección.

Que podemos facer?

Nós e outros científicos en todo o mundo

estamos a buscar moléculas
que poidan potenciar a resposta á vacina.

Chámanse adxuvantes,

do latín "adjuvare", axudar.

Os adxuvantes son moléculas
que podemos engadir a unha vacina

para obter unha maior resposta.

E na presenza do adxuvante,
representado aquí en vermello,

tes unha activación moito máis profunda
dos glóbulos brancos

do teu sistema inmune,

e tes unha resposta inmune
moito maior,

con niveis de anticorpos moi superiores,
máis rápida,

e que dura moito tempo,
obtendo unha inmunidade duradoira.

Curiosamente, estes adxuvantes
teñen efectos distintos

segundo a idade e outros factores
demográficos do individuo.

O que me leva á idea
de vacinas de precisión.

Esta é a idea de que tomaremos
a medicina de precisión

(sabedes o que é, non si?

É a idea de que as poboacións
poden variar

na súa resposta
a un determinado medicamento)

e aplicámola ás vacinas.

Si?

E aquí no Hospital Infantil de Boston,

no Programa de Vacinas de Precisión
que eu dirixo,

temos cinco enfoques,
nos que paso a paso

queremos facer vacinas de precisión,

adaptadas a poboacións vulnerables.

Primeiro

temos que entender cal é a actitude
dunha poboación determinada

fronte á vacina.

Podes facer a vacina
máis sofisticada do mundo,

pero se ninguén quere poñela
non serve de nada.

Segundo,

temos que pensar na vía de inmunización.

A maioría das vacinas
son intramusculares, ou IM,

pero hai outras, intranasais, orais, etc.

Como acabo de describir,
as vacinas teñen compoñentes.

Todas as vacinas teñen un antíxeno,

que é a parte do microbio
que o teu corpo ten que lembrar,

para que poida fabricar anticorpos
ou inmunidade mediada por células.

E podemos engadir un adxuvante,

para impulsar a resposta inmune.

Pero sabedes unha cousa?

Hai moitos antíxenos distintos
para escoller,

e moitos adxuvantes.

Como imos tomar esa decisión?

E a selección dispoñible segue crecendo.

Así que no noso equipo

desenvolvemos xeitos de probar
as vacinas fóra do corpo

(en latín iso é in vitro)

nunha placa de Petri.

Por iso usamos a enxeñería de tecidos
con células do sangue

para inmunizar fóra do corpo

e estudar os efectos da vacina

por exemplo en bebés ou persoas maiores.

E se o pensas, isto é fundamental,

pois se miras todas as infeccións
contra as que queremos facer vacinas,

coma o virus do Zika, o do Ébola,
o VIH, e outros,

todos os antíxenos candidatos,

todos os adxuvantes candidatos,

as diferentes poboacións,

vai ser imposible facer grandes ensaios
clínicos de fase III

para cada combinación.

Aquí cremos que poder probar
as vacinas fóra do corpo

pode cambiar moito as cousas
e acelerar o desenvolvemento de vacinas.

Finalmente, todo este esforzo
consiste en impulsar

unha resposta inmune que protexa
contra ese patóxeno en particular,

e conseguir que os anticorpos
e outras células defendan o corpo.

Estamos a usar máis enfoques innovadores

para levar a ciencia máis punteira
á creación de vacinas.

Estamos profundando nos motivos
polos que as vacinas actuais protexen.

Formamos un consorcio internacional

para estudar como a vacina da hepatite B
protexe aos neonatos

da infección pola hepatite B.

E para iso,

elaboramos unha técnica chamada
mostra pequena, datos grandes.

Podemos obter unha pequena pinga de sangue
do bebé antes da inmunización,

e outra pinga despois da inmunización,

e podemos medir o inventario
de todas as células,

e todos os xenes e moléculas
nesa pinga de sangue,

e podemos comparar o despois da vacina

co antes da vacina no mesmo bebé

e comprendermos
de xeito máis profundo

como protexe exactamente esa vacina
eficaz.

E podemos usar esas leccións
para facer as próximas vacinas nun futuro.

Polo tanto este diagrama ilustra
que unha pequena pinga de sangue

dá enormes cantidades de información,

decenas de miles de substancias,

e esa maraña representa
as vías xénicas que están activadas

e as vías moleculares que están activadas.

Moito máis aínda por vir,
moita ciencia emocionante.

Estamos asociados con científicos
de todo o mundo

para traer todas estas novas tecnoloxías
e dinamizar o desenvolvemento de vacinas

na rede de Vacinas de Precisión.

Imos adiantar as vacinas
personalizadas

para as poboacións vulnerables
de todo o mundo.

O noso equipo inclúe científicos,
expertos técnicos e médicos.

E estamos a desenvolver vacinas
contra enfermidades infecciosas

coma a tos ferina.

Temos unha vacina contra a tose ferina,

pero require múltiples doses

e a inmunidade segue caendo.

Queremos desenvolver
unha vacina da tose ferina de dose única.

Estamos traballando nunha vacina
contra o virus respiratorio sincitial,

a primeira causa
de hospitalización infantil nos EEUU.

Unha vacina da gripe mellor,

e desde logo, unha contra o VIH.

Tamén estamos a buscar
vacinas contra o cancro, as alerxias

e contra a sobredose de opioides.

Así que esta é
a miña mensaxe final para ti.

As vacinas protéxente a ti
e aos teus seres queridos

e á xente do teu arredor.

Non só te protexen da infección,

evitan que a difundas a outros.

Vacínate.

O progreso científico é fráxil
e pode perderse.

Debemos fomentar un diálogo público
preciso e respectuoso.

E por fin, estamos a piques
de grandes cousas,

unha nova era da vacinación.

Só revisamos superficialmente
o que se pode conseguir.

Por favor defende esta investigación.

Grazas.

(Aplausos)