WIKITONGUES: Anass speaking Moroccan Arabic

السلام عليكم, أنا سميتي أناس , عندي 28 عام

و كانصور هاد الفيديو د الدارجة المغربية هنايا فالسويد

كيما كاتشوفو كاين البرد و كاين الثلج

و كاين مورايا البحر لي تاهو مجمد

المهم قررنا نصورو هاد الفيديو بحال هاكا باش نشوفو الدارجة كيفاش كاتًنطق

كيفاش كاتًهضر باش الناس لي بغاو يسمعو الدارجة و لا لي ماعمرهم ماشافوها كيفاش كاتًهضر تكون عندهم فرصة باش يشوفوها

و فنفس الوقت قلنا نصورو فهاد المنظر هذا هنايا مع البرد و الأجواء شويا استوائية بالنسبة لينا

باش تكون الفيديو زعما ممتعة و فنفس الوقت حتى التصاور يكونو ممتعين

المهم كيما كاتعرفو الدارجة هي واحد, صعيب واش نقولو واش لهجة و لا لغة, ولكن هي واحد الحاجة لي كاتًهضر فالمغرب

و هي إلى جانب الأمازيغية وحدا من اللغات و لا اللهجات لي كيتهضرو فالمغرب

الهدف من هاد الفيديو هذا لي كاندير دابا هو باش واحد الجمعية اسمها ويكي طونكً, أولا ويكي ألسنة

كيحاولو يصورو اللغات ديال كًاع العالم, ومن بينهم الدارجة لي كانعتابروها تاهي واحد الحاجة منطوقة فالعالم

سواء لغة ولا لهجة, أنها تا هي تتصور و تكون داخلة فالقاعدة د البيانات ديالهم

باش الناس يشوفو الدارجة كيفاش كاتًهضر و كيفاش كاتًنطق و يسمعوها و لي بغا يتعلمها يلقا تاهو فرصة باش يتعلمها

إيوا المهم كيما قلت حنايا حاليا فالسويد و كانصوًرو هاد الفيديو و كانتمنى يعجبكم تا هاد المنظر لي كانصوًروه معانا ديال الثلج

واخا دابا شويا طلعات الشمش و لكن كانتمناو تكون ماكاتأترش على الفيديو بزاف

بما أنه الفيديو على الدارجة قلت أنه من الأحسن نهضر فيه شويا, يكون الموضوع ديالو هو الدارجة نيت باش نهضرو عليها

كيما قلت الدارجة هي واحد اللهجة لي كاتًهضر هنايا فالمغرب و هي مخلطة بزاف ديال اللغات

من بينهم, أهم اللغات لي مخلطاهم كاينا العربية و الأمازيغية, و فيها شي كلمات ديال السبليونية تاهوما, و مؤخرا بداو كيدخلو شي كلمات ديال الفرانساوية مع داكشي ديال التكنولوجيا

و الكلمات ديال داكشي لي جديد بحال دابا كلشي لي عندو علاقة بالحواسيب و السيارات إلخ

هي واحد اللهجة لي كاتًهضر فبزاف ديال البلايص ولا المناطق, ماشي غير فالمغرب

حيث حنايا عادة كانحاولو ديما نحصرو البلدان بالحدود ديالها الحالية و حنا عارفين الحدود كيفاش ترسمو

فمثلا إلا جينا نقارنو المغرب مع الجزائر, را الجزائر تاهوما كيهضرو واحد الدارجة لي هي قريبة لنا, و حتى تونس راها قريبة لنا شوية من ديك الناحية

فبالتالي صعيب باش نقولو الدارجة د المغرب هي واحد الحاجة مستقلة مثلا على الدارجة د الجزائر

يقدرو يكونو نفس الحاجة, غير اعتباطيا جاو واحد الوقت واحد الحدود لي فرقًو بيناتهم

ف ما نقدرش نعطي حد (حدود) بالضبط فين كاتًهضر و فين ماكاتهضرش

ولكن كيما قلت الدارجة هي واحد اللغة و لا اللهجة لي كاتًهضر فبزاف د البلايص خاصة فالمغرب

كاين واحد العدد كبير من الناس لي ساكنين فالمغرب لي كيعرفو للدارجة, و هي فيها بزاف ديال الأنواع

المهم, الجوج د الأنواع لي مهمًين فالدارجة, أولا نقدرو نقولو جوج د العائلات ماشي أنواع, هي الدارجة الهلالية و الدارجة اللاهلالية

هاد الفيديو غادي تكون شوية قصيرة ماعناش الوقت باش نفسًرو كلشي و لكن غانحاول نعطي عليها نبذة

و لي بغا يتعمق ممكن مثلا يشوف المقال ديال ويكيبيديا على الدارجة, و لا يقدر يطرح أسئلة مبعد

فالدارجة اللاهلالية هي الدارجة لي كانت فالمغرب قبل مايجيو قبائل بني هلال

قبائل بني هلال هوما واحد القبائل عربية لي جاو فالقرن 13, إلا بقيت عاقل مزيان, للمغرب

و جابو معاهم الدارجة ديالهم لي هي الدارجة الهلالية

أكبر الفوارق لي كاينة مابين الدارجة اللاهلالية و الدارجة الهلالية, هي أنه الدارجة اللاهلالية كاتًهضر فالمدن القديمة, بينما الدارجة الهلالية هي لًي كاتًهضر كثر فالعروبية و لا البوادي

الدارجة اللاهلالية كاتًميز مثلا بأنها كاتكون فيها شي كلمات مثلا مافيهاش حرف ال"كً" بزاف فيها "القاف" مثلا تيقول "قول" ماشي "كًول"

و هي الدارجة لي قلت كاتًهضر بزاف فالمدن القديمة كثر

و بطبيعة الحال كاين لغات خرين فالمغرب, مثلا اللغة الأمازيغية لي فيها بزاف ديال اللهجات

على حساب آخر ماعرفت كاين تقريبا شي 64 لهجة ديال الأمازيغية

فماشي غي ديك الثلاثة لي معروفين, إنما كاين لهجات صغار فبزاف د المناطق, و كل واحد كيفاش تيهضرهم

و قبل مانسالي هاد الفيديو بغيت نقول بأنه مزيانة الدارجة ديالنا الواحد يكون عارفها و الواحد يكون ديما مفتاخر باللغة ديالو لي كيهضر

خاصة لاعرف أنها عندها تاريخ قديم و مخلطة بزاف ديال اللغات و بزاف ديال الحوايج

فالواحد مثلا إلا عرف الدارجة يقدر يعرف كثر شناهيا العربية, شناهيا الأمازيغية و يعرف الخليط لي بيناتهم

و كانتمنا ديما يكون عندكم اهتمام باللغات ديالكم لأنها واحد الحاجة مزيانة, و هي جزء من الهوية ديالك سواء بغيتي ولا كرهتي

فشكرا ليكم كلكم على المتابعة ديالكم, نتمنا تكونو ستافدتيو مع هاد الفيديو هادي