我好鍾意一種曾經睇過嘅講法 係話人類喺物種進化上 成功嘅其中一個因素 係多得我哋無體毛 我哋因為無體毛，加上發明咗衫 我哋可以調節體溫 以至無論喺咩氣候之下都生存到 依家我哋已經進化到冇衫就生存唔到 同時衫已經唔凈係衫 佢仲有表達嘅用途 所有我哋著上身嘅服飾 都喺度訴說緊我哋嘅嘢 例如透露緊我哋曾經去過邊度 我哋做緊乜嘢、我哋想成為乜嘢人咁 細個時我好孤單 我一直都好難搵到細路仔同我玩 於是我整咗好多遊戲同自己玩 我為自己做咗好多玩具 最初係從雪糕開始 我家鄉有一間 Baskin Robbins 喺櫃台後面，佢哋將雪糕 裝喺呢啲超大、五加侖裝嘅紙桶裏面 喺我八歲嗰時，有人話畀我知 佢哋用完紙桶之後 會將紙桶洗乾淨，放喺後面 如果你問佢哋，佢哋會畀一個紙桶你 我用咗幾個星期去鼓起勇氣去問 最後我問咗，佢哋又畀咗個我 我就摞住呢個靚紙桶返咗屋企 我喺度諗要點處理呢個新奇嘅嘢 有金屬環、蓋同埋底 我將佢倒轉戴喺頭上 之後我諗，「等陣， 呢樣嘢啱啱好戴得落我個頭。」 （笑聲） 冇錯，我剪咗個窿 放咗啲醋酸纖維落去 成個太空頭盔就咁大功告成！ （笑聲） 之後我諗我仲需要一部太空船 就喺距離屋企幾條街嘅地方 我搵到一個裝冰箱嘅紙皮箱 我將佢推返屋企 之後喺我爸爸媽媽嘅客房個衣帽間裏面 我將佢整成一部太空船 我先用紙皮箱整咗塊控制面板 我剪咗一個圓形當做雷達顯示 同埋喺雷達後面放咗個電筒發光 我再利用牆壁做支撐，整咗個駕駛窗口 其實我真係覺得自己好機智 我擅自將衣帽間後面幅牆油黑佢 再用喺閣樓度搵到嘅聖誕燈 佈置到成個星空咁 之後我就去繼續幻想我嘅太空使命 幾年之後，電影《大白鯊》上映 雖然唔啱細路仔睇，但我對佢入曬迷 就好似當時其他美國人咁樣 有件「大白鯊」服裝掛咗喺 我鎮上面嘅一間士多 我媽媽肯定係聽到我同人哋講 我覺得士多件衫幾咁型 所以喺萬聖節嘅前幾日 送咗我呢件大白鯊衫 件事係完全出乎曬我嘅意料 依家，我成日聽到 某個年齡層嘅人喺度抱怨 依家啲細路仔唔知自己嘅生活有幾好 咁就等我舉個簡單嘅例子嚟講下 呢啲細路入門級扮演服裝 係依家你喺網上可以買到嘅 呢件就係… 我媽買畀我嘅大白鯊衫 （笑聲） 鯊魚塊面薄到好似張紙咁 圍嘴上面仲要黏住張《大白鯊》廣告 （笑聲） 但我就係鍾意佢 幾年之後 爸爸帶我去睇一部叫做《聖劍》嘅電影 事實上我叫佢帶我去睇兩次 而且對我嚟講係好大件事 因為呢部電影係一部限制級嘅 R 片 不過唔係血腥場面、內臟 或者女性胸部吸引我去睇多一次 雖然呢啲都幾有吸引力 （笑聲） 係盔甲吸引我 我覺得《聖劍》嘅盔甲真係好靚好型 騎士著住好閃嘅 好似塊鏡咁反光嘅盔甲 仲有，騎士去到邊度都著住件盔甲 佢哋著住盔甲食飯，又著住盔甲瞓覺 （笑聲） 我就諗︰「唔通佢哋解讀緊我嘅思想？ 我都想喺任何時候都著住件盔甲！」 （笑聲） 所以我又返去搵我最鍾意嘅材料︰ 手工嘅材料 有波紋嘅硬紙皮 我同我自己整咗套盔甲 加咗護頸，配埋一匹白馬 雖然我已經將佢賣咗 但我哋可以睇下張相 （笑聲） （掌聲） 呢個係我受到《聖劍》啓發 而整嘅唯一一套盔甲 幾年之後 我說服咗我爸爸動手整返件啱身嘅盔甲 大概過咗一個月，佢幫我升級咗材料 從硬紙皮 到叫做「遮雨板」嘅 鋁製屋頂材料 仲有一種我一直都好鍾意嘅連接材料︰ POP 鉚釘 成個月，我哋都喺度小心翼翼咁 整一套鋁製鉸接式 有好多混合波紋嘅盔甲 我哋喺頭盔度鑽咗幾個窿，方便我透氣 咁啱喺萬聖節之前整好咗 於是我就著住佢去返學 依家，呢樣嘢冇幻燈片可以畀你哋睇到 因為我無呢套盔甲嘅相 但我有著住佢去返學 當時有個年刊攝影師喺走廊度周圍影相 佢從來都冇搵到我 後來發覺係有原因嘅 有啲嘢喺我著住套鋁製盔甲 去返學個時完全無諗到嘅 當時係第三期數學班 我企喺課室嘅後面 因為我著住套盔甲根本就坐唔低 （笑聲） 呢個係我冇預到嘅第一件事 之後我嘅老師好擔心咁望住我 隔住大概半個課室問我有冇事 我諗：老師你冇嘢掛？我有冇事？ 我依家著住套盔甲啊！ 我係度享受緊我…… 就喺我準備要話畀佢知我有幾爽嗰時 我見到成間課室開始向左傾斜 跟住就消失喺呢條長長嘅隧道 之後我喺校醫室醒返 我因為套盔甲中暑虛脫而暈咗 當我醒返嗰時 我冇因為喺成班同學面前暈低而尷尬 反而我諗，邊個摞走咗我套盔甲？ 我套盔甲喺邊度？ 好，講緊幾年後 我同幾個同事一齊受聘請去 同探索頻道做一檔 叫做《流言終結者》嘅節目 大概有 14 年嘅時間 我都喺度學習點樣去訂立實驗方法 同埋點樣喺電視上面講故事 同時我又好早就知道 服裝可以對講故事起到舉足輕重嘅作用 我用服裝令我哋講述嘅故事 更加幽默、清晰，有喜劇效果、有色彩 後來當我哋做一集《垃圾搜尋》 我又有更深一層嘅體會 我領悟到服裝對我有更深嘅意義 喺《垃圾搜尋》呢一集 我哋想回答嘅問題係： 跳入一個大型垃圾裝卸卡車係唔係 真係好似電影裏面演嘅咁安全？ （笑聲） 呢一集係打算分成兩部份進行 一部份係我哋接受特技演員嘅訓練 學識從建築物跳到氣墊上面 而第二部份就係嚟真嘅 大型垃圾裝卸卡車會裝滿緩衝物料 俾我哋跳入去 我想呢兩部份 做到唔同嘅視覺效果 之後我諗︰「好， 既然第一部份我哋喺度訓練緊， 咁我哋就應該著住運動衫。 唔得！不如將 『特技訓練生』印喺衫後面， 話畀人知係訓練嘅。」 但係到咗第二部份 我想要視覺衝擊嘅效果 「我知道啦！ 我會著成《黑客帝國》 嘅 Neo 咁。」 （笑聲） 所以我就去咗海特街 買咗啲好靚、及膝、有皮帶扣嘅長靴 跟住我又喺 eBay 度搵到一件褸 仲有一副墨鏡 為咗戴墨鏡，我仲要特登戴隱形眼鏡 做實驗嘅日子終於嚟嘞 我著住呢套衫落車 之後我嘅劇組人員都望住我 個個人都喺度揞住嘴偷笑 就好似咁 （大笑聲） 呢一刻我有一種冰火兩重天嘅感覺 非常尷尬 因為喺我同事睇嚟 我對呢套衫已經癡迷到走火入魔 （笑聲） 不過我腦裏面把聲喺度提醒我 喺高速鏡頭嘅慢動作裏面 我件風褸迎風飄揚嗰時肯定好型 （笑聲） 同《流言終結者》做咗五年節目之後 我哋收到聖地牙哥國際動漫展嘅邀請 我都知道咗呢個動漫展好多年 但係都冇時間去 呢場動漫展好比 服裝界嘅盛事、服裝界嘅麥加 啲人從世界各地飛過去 展示佢哋嘅驚世嘅作品 我都想去參加 我決定要精心製作一套 會將我從頭包到落腳嘅戰服 咁就冇人知道我喺 聖地牙哥國際動畫展嗰度 我揀咗邊件衫？ 地獄男爵 嗰個唔係我件衫 嗰個真係地獄男爵嚟！ （笑聲） 但係我洗咗幾個月嘅時間 盡可能還原地獄男爵喺螢屏上嘅形象 從佢嘅長靴，到皮帶，到長褲 再到「毀滅之右手」 我搵人整咗地獄男爵頭部同胸部 跟住我將佢哋著上身 我甚至搵到咗心水嘅隱形眼鏡 我著住呢套衫行入動漫展 講真，著住件衫真是好鬼熱 熱到你無法想像 （笑聲） 大汗淋漓！我早就應該醒起 我不停咁飚汗，隱形眼鏡又好傷我對眼 但係呢啲都唔緊要 因為我愛上咗角色扮演 （笑聲） 不單止係因為可以著上套衫 喺動漫展度行 仲因為我可以見到其他角色扮演者 但搞清楚，動漫展裏面嘅裝扮 係叫做「角色扮演」 表面上，角色扮演就係 人著到佢哋最鍾意嘅電影電視角色咁 尤其係著到日本動漫咁 但係當中含義唔係咁簡單 佢哋唔係搵到套衫著上身算 佢哋將角色同自己融合起嚟 佢哋令套衫嘅角色 跟住自己嘅諗法去做 當佢哋著住套衫個時 佢哋將角色變成心中想要嘅角色 佢哋係犀利嘅天才 佢哋做出好靚嘅嘢令人嘆服 （笑聲） 除此之外，佢哋仲會排練 喺聖地牙哥，或者任何其他嘅動漫展 你唔係淨係同 個啲行黎行去嘅人影相 實際上你會行上去講 「嘿，我好鍾意你件衫， 唔知可不可以影相？」 之後你俾佢哋時間去擺甫士 佢哋好努力咁擺姿勢 就為咗你部相機可以影到靚嘅畫面 而呢一幕真係好靚，我會將佢記低 喺後來嘅動漫展裏面 我去學 Heath Ledger 喺《黑暗騎士》裏面 扮演小丑一角嘅蹣跚步履 我去學點樣扮成《指環王》嘅恐怖戒靈 跟住我真係嚇親一啲細路仔 我仲學識咗「呵呵笑」 就好似楚巴卡喺《星球大戰》裏面咁笑 然後我扮成《千與千尋》嘅無面男 如果你唔知道《千與千尋》 同埋佢嘅導演宮崎駿嘅話 我係好樂意講解下 （笑聲） 呢部電影真係一部傑作 一直都係我其中一齣最鍾意嘅電影 喺電影裏面 一個叫荻野千尋嘅女仔喺 日本嘅一個廢棄公園嘅 靈異世界嗰度蕩失路 喺幾個朋友嘅幫助之下 佢又重新搵到出返嚟嘅路 其中兩個朋友 一個叫做白龍，一條被捉嘅龍嚟 另一個叫做無面男，孤獨魔鬼嚟 無面男好孤單，佢好想同人做朋友 佢認為交朋友嘅方法 就係將佢哋誘惑到自己身邊 再喺手上變出金幣 但係呢種方法唔係咁好用 所以最後佢性情暴變 直到荻野千尋拯救咗佢，佢先至平靜返 我著上無面男套衫 行入聖地牙哥國際動漫展嘅會場 我非常認真咁練習無面男嘅動作 我決定著住呢套衫個時唔出聲 當有人想同我影相個時，我會點頭 同埋會好怕羞咁企喺佢哋隔籬 當佢哋影相 我會偷偷地從我件長袍後面 摞出一塊朱古力金幣 等佢哋影完相之後，我會送佢哋金幣 啊，啊，啊！——就好似咁 之後佢哋就會非常興奮 「天啊！無面男嘅金幣！ 難以置信，太犀利啦！」 我好享受，之後我繼續喺動漫展度行 大概喺 15 分鐘之後，有件事發生咗 有人捉住咗我嘅手 佢哋俾返金幣我 我覺得佢哋喺度回禮 但係唔係，呢個明明係我送出去嘅金幣 但我唔知道點解佢哋咁做 於是我繼續行，我又影咗更多嘅相 但又有人俾返金幣我 你要知道，著住套衫嗰時 我乜都睇唔到 我可以通過面具嘅嘴睇到 啲人嘅鞋、佢哋講嘅嘢、佢哋對腳 但係喺第三次有人將個金幣俾返我嗰時 我想知道到底發生咗啲乜嘢 為咗睇得清楚啲，我將頭稍微向後傾斜 我睇到有人從我身邊行開，就好似咁 呢一幕令我突然醒悟： 摞到無面男嘅金幣係不祥之兆 因為喺電影《千與千尋》裏面 如果有人向無面男摞咗金幣 厄運就會降臨 呢個唔係講緊演員同觀眾嘅關係 而係角色扮演背後嘅意義 我哋，全部喺會場上嘅人 都喺度將自己注入到 對我哋嚟講有某種意義嘅故事裏面 再將佢變成我哋自己嘅故事 我哋內心深處都有啲重要嘅嘢 而服裝就係我哋表達內心嘅嘢畀其他人 多謝 （掌聲）