我想帶你哋去另一個世界
我想同你哋分享
一個同窮人長達 45 年嘅故事
呢班窮人每日連一蚊美金都賺唔到
我曾經喺印度接受
精英、貴族、高昂嘅教育
但咁嘅教育幾乎摧毀我嘅人生
我被選做外交官、老師、醫生
呢啲工全部都等住我
但我冇做呢啲工
因為我三年嚟都係參加緊
印度國家壁球比賽
（笑聲）
成個世界就好似為我準備好曬
一切都喺我掌握之中
差錯絕對冇可能發生
但係之後我出於好奇
我想去鄉下工作、生活下
感受一下係點嘅感覺
所以喺 1965 年
我去到印度比哈爾邦
經歷嗰度史上最大嘅飢荒
我第一見到飢荒同死亡
我嘅生命亦從此改變
我返到屋企
同我母親講：
「我想去鄉下做嘢，喺嗰度生活。」
佢震驚到暈咗
（笑聲）
「你係咩意思？
成個世界都為你而鋪排好曬，
最好嘅工等住你做，
你宜家同我講想去鄉下工作？
你係唔係有問題？」
我話：「我受過最好嘅教育，
令我學識咗思考。
我決定要用我所學，回饋社會。」
「你想去鄉下做咩？
你無工作，無錢，無保障，無前景。」
我話：「我想喺嗰度生活，
挖五年井。」
「挖五年井？
你讀過全印度最貴嘅學校，
宜家你話想用五年時間去挖井？」
自此之後，佢好耐無同我講嘢
因為佢覺得我令屋企人丟架
不過，喺村裡邊、喺窮人身上
我見識咗最非凡嘅知識同技能
但呢啲知識同技能從來都唔入流
從來無被外邊嘅人
注意過、尊重過，同廣泛應用過
我於是諗創辦一間赤腳學院
一間只為窮人開辦嘅學院
將窮人認為重要嘅想法體現喺學院裏邊
第一次去到個農村
年紀老邁嘅長者過嚟問我：
「你係咪通緝犯？」
我話：「唔係。」
（笑聲）
「考試肥佬？」
我話唔係
「搵唔到政府工？」
我話唔係
「咁你過嚟做咩？點解要嚟呢度？
印度嘅教育制度
只會令你嚮往巴黎、新德里
或者蘇黎世呢啲地方。
你嚟我哋鄉下到底做咩？
你係唔係有嘢瞞住我哋未講？」
我話：「冇，
我只想為窮人創辦一間學院。
窮人認為重要嘅想法
可以喺學院裏邊體現出嚟。」
呢啲長者給咗我好多建設性嘅提議
佢哋話：
「唔好畀有學歷或者證書嘅人
入呢間學院。」
所以我哋係印度唯一一間
唔請博士同碩士嘅學院
（笑聲）
你必須要係逃學者
考試唔合格，或者輟學
先至能夠入嚟我哋學院
你必須用勞力做嘢
唔會因為勞動而羞恥
要向社區證明你有佢哋所需要嘅技能
同埋服務社區
所以我哋開始咗赤腳學院
我哋將「專業」重新定義
咁點先算一名專家？
專家指嘅係嗰啲
有能力、自信心同信念嘅人
搵水源嘅人係專家
接生婆同樣係專家
鐵打師傅都係專家
專家遍佈世界各地
你可以喺任何偏僻嘅村落
揾到佢哋嘅身影
我哋認為我哋要畀呢啲人
喺我哋主流社會裏邊
證明佢哋擁有嘅知識同技能
係全世界都需要嘅
正因為呢啲知識同技能今日仲有用
佢哋應該推展到全世界同埋廣泛應用
呢間學院奉行
聖雄甘地嘅生活同工作文化
食飯、瞓覺同工作都喺地下
冇有合同，從來都唔需要簽合同
你可以喺度做廿年，然後聽日就走
無人可以一個月賺取多過一百美金
如果你想賺錢，你就嚟錯咗地方嘞
如果你愛工作而且愛挑戰
赤腳學院歡迎你
呢度我哋想你測試瘋狂嘅想法
無論係點嘅想法，都可以大膽嘗試
失敗無所謂
最多咪重頭嚟過
呢度係唯一一間
老師同學生身份互換嘅學院
同時亦係唯一一間唔頒證書嘅學院
你嘅學歷係由你服務嘅社區嚟鑑定
你唔需要喺牆上掛起一張證書
嚟證明你係工程師
當村民聽到我呢番話
佢哋話：「好啊，你用行動實踐呀。
如果你做唔成，
你講嘅全部都係廢話。」
所以喺 1986 年
我哋成立第一間赤腳學院
係十二位連字都唔識嘅建築師
以每平方呎 $1.5 美金嘅成本
興建咗呢間學院
一百五十人喺嗰度住同做嘢
2002 年時佢哋獲頒阿迦汗建築獎
但評委懷疑有其他建築師參與
於是我話畀佢哋︰「的確有，
但佢哋只係畫藍圖，
而落手落腳起嘅
只有赤腳學院嘅建築師。」
因為佢哋唔信我哋赤腳學院嘅建築師
而且我哋認為佢哋喺度誹謗
所以我哋係唯一一個得獎者
將五萬蚊獎金還返畀主辦方
我問一位林務員
一位權威、有學歷證書嘅專家
我問︰「你可以喺度起咩？」
他望一望泥土，話︰
「算數啦，冇可能。根本唔值得。
無水，周圍都係岩石地。」
我開始有啲擔憂
我話：「咁好啦，
我去問下村嘅長老。」
我問呢度可以種咩
長老望住我講︰
「你起呢個，放呢個，咁就得㗎嘞。」
學院今日就係咁嘅樣
我記得當時我上去屋頂望
但所有嘅婦女都話︰
「出去，男人唔上得嚟，
因為我哋唔想同男人分享呢門技術，
事關宜家喺房頂整緊防水工程。」
（笑聲）
防水材料有棕櫚糖、蕁麻
仲有一啲我唔知嘅嘢
但佢的確防水
1986 年到宜家都無漏過水
呢門技術，婦女唔會同男士分享㗎嘞
（笑聲）
呢間亦係唯一完全由太陽能供電嘅學院
所有電力嚟自太陽
四萬五千瓦嘅太陽能板裝喺屋頂
今後 25 年都係靠曬太陽
只要有陽光，我哋就唔怕冇電
但呢樣嘢獨特在
佢係由一位受過只有八年小學教育
從來冇讀過中學或者讀大學嘅
印度教牧師裝嵌
我敢講佢喺太陽能方面嘅知識
全世界無人能及
如果你嚟到赤腳學院
所有食物都係靠太陽能煮熟
而組裝太陽能烹調器具嘅人
全部都係唔識字嘅女性
佢哋組裝咗最尖端複雜
呈拋物線形狀嘅太陽能烹調用具
不幸嘅係，佢哋幾乎有一半德國血統
或者係咁，佢哋做嘢非常精確
（笑聲）
你無可能揾到做嘢咁精確嘅印度女性
成個器具嘅製作過程就全靠佢哋
我哋每日兩餐飯，一餐六十份
全靠太陽能煮好
學院有一位牙醫
佢係一位唔識字、而且有孫嘅阿婆
但佢真係牙醫，仲幫七千名兒童睇牙
赤腳科技：
呢年係 1986 年
當時無工程師、無建築師諗到
但我哋諗到收集屋頂雨水
所以咁多年嚟我哋浪費咗好少水
所有屋頂嘅水槽都同地底
一個有四十萬升容量嘅水箱連接
所有水都唔會浪費
即使發生四年乾旱
因為儲雨水嘅關係
我哋嘅學院都唔會缺水
另外，六成小朋友
因為幫屋企而無機會返學
呢啲小朋友要睇住動物︰山羊、綿羊
仲要理埋家頭細務
有見及此
我哋決定為呢啲孩子開辦夜校
因為呢啲夜校
令超過七萬五千個細路都有得返學
夜校嘅出現係因為孩子嘅需要
而唔係為咗方便老師
我哋學校教咩？
民主、公民資格
點樣測量土地
俾人拉之後要做嘅嘢
生畜病咗點算
呢啲都係我哋夜校教嘅知識
所有學校仲係完全靠太陽能供電
每到五年，我哋搞一次選舉
六至十四歲嘅兒童
都會喺呢個民主選舉裏邊投票
選出一個總理
現任總理係一個十二歲嘅女仔
佢朝早看住二十隻羊
但夜晚就做返總理
佢有自己內閣
有教育部長、能源部長、衛生部長
佢同內閣負責監督同管理
150 間學校 7,000 名學生
五年前呢位總理得到世界兒童獎
佢仲去咗瑞典攞獎添
佢第一次離開條村
佢從未去過瑞典
但佢對當時嘅場面都一啲唔驚訝
瑞典皇后當時都喺度
佢問我：「你可唔可以
問下呢個小朋友，
佢嘅自信邊度嚟？
佢先得十二歲，但完全唔驚嘅？」
企喺皇后左邊嘅呢個細路女
轉身對住我，望住皇后
然後同我講：
「話畀佢知，我係總理。」
（笑聲）
（掌聲）
喺文盲率太高嘅地方，我哋用木偶溝通
木偶就成為我哋溝通嘅方式
呢個三百歲嘅木偶，佢叫喬金查查
佢係我嘅心理分析師、我嘅導師
我嘅醫生、我嘅律師、我嘅捐贈者
佢幫我籌款，解決爭執
仲幫助村落解決問題
如果村落發生糾紛
如果返學嘅出席率少咗
如果老師同家長發生磨擦
木偶會叫老師同家長嚟到全村人面前
然後講「握手言和，出席率唔可以跌」
呢啲木偶仲係用回收返嚟嘅
世界銀行報告書整成
（笑聲）
（掌聲）
呢個用太陽能為條村供電嘅方法
唔單止容易做到
而且仲拓展到成個印度
從拉達克到不丹
所有太陽能供電嘅村
都係由受過培訓嘅人去做
我去咗拉達克
問咗一位當地婦女
喺呢度，零下四十度
因為室內無地方匿，屋兩邊又俾雪覆蓋
你只能夠喺屋頂爬出嚟
我哋問佢：
「太陽能發電對你有咩好處？」
佢唸咗一陣，答：
「佢令我第一次喺冬天
見到我老公個樣。」
（笑聲）
嚟到阿富汗…
我哋喺印度學識嘅一件事︰
男人係教唔識嘅
（笑聲）
佢哋唔願意靜落嚟
但係又雄心勃勃、易衝動
而且都想要張沙紙
證明自己實力
（笑聲）
你會發覺世界各地嘅男士
都想要一張證書
點解？
因為佢哋想離開村落，去城市揾工
我哋諗到一個好辦法，就係訓練阿婆
如今世上最好嘅溝通方式係咩？
電視？唔係
電報？唔係
電話？唔係
向女性傾訴
（笑聲）
（掌聲）
我哋第一次嚟到阿富汗時
揀咗三位女性
同當地人講︰
「我哋想帶佢哋返印度。」
當地人話︰「冇可能。
佢哋連自己間房都出唔到去，
點會同你去印度！」
我話：「我哋可以妥協，
可以畀佢哋老公一齊嚟。」
結果佢哋老公跟埋嚟
當然，女性比男性更有智慧
喺六個月內，我哋係點樣練呢啲女性？
手語
唔用文字
唔用講嘢
只用手語
就喺六個月內
佢哋就成為咗太陽能工程師
佢哋返去自己條村度
裝設太陽能發電設施
呢啲女性返去
為阿富汗第一條村提供太陽能電力
同開辦工作坊
阿富汗第一個靠太陽能發電嘅村落
就靠三位女性親手建立
呢位女性係一個非比尋常嘅婆婆
55 歲，已經為阿富汗二百間房屋
提供太陽能電力
而且無一間冧過
呢位阿婆去咗阿富汗政府嘅工程部門
話畀個部門知交流電同直流電嘅分別
而嗰位部長唔知個分別
嗰三位女性又再培訓另外 27 位女性
為阿富汗一百條村實現太陽能發電
我哋去咗非洲，做咗同樣嘅事
呢啲女性嚟自八、九個國家，坐埋一齊
講唔同嘅語言，互相傾偈
只係唔會聽得明對方講嘢
但佢哋嘅肢體語言犀利
足以令佢哋可以明白對方
就係咁，佢哋學有所成
成為咗太陽能工程師
我亦都去咗塞拉利昂
有一晚個首相經過呢條村
佢揸返轉頭，問呢度發生咗咩事
村民話：「就係呢兩位阿婆…」
「阿婆？」首相難以置信
「佢哋去咗邊度？」
啲人答︰「佢哋喺印度返嚟。」
首相之後見總統，話：
「你知唔知我哋國家
有一個靠太陽能供電嘅村？」
總統話：「唔知道。」
第二日內閣一半嘅成員
都去拜訪呢啲阿婆
佢哋想知點樣做到
總統傳召咗我
問我可唔可以幫佢培訓 150 位阿婆
我話：「總統，我唔得。
不過呢啲阿婆可以做到。」
總統為我哋喺塞拉利昂
興建咗第一間赤腳培訓中心
之後有 150 位阿婆喺呢度受訓
喺甘比亞，我哋都挑選咗一位阿婆
我哋去咗呢條村
我好知道要揀邊個女性
但成條村嘅人都推薦：
「呢兩位女性適合。」
我話：「唔係，我想要呢位女士。」
佢哋話：「點解？
你同佢溝通唔到，你又唔識佢。」
我話：「我鍾意佢嘅身體語言，
同埋佢講嘢嘅方式。」
但啲人話，佢老公比較麻煩
咁我哋叫佢老公出嚟
佢老公大搖大擺行過嚟
十足政客咁，揸住手機話「唔得！」
我問點解？
佢話︰「睇下我老婆幾靚。」
我話：「係，佢係好靚。」
佢話：「如果佢同某個
印度男人私奔，咁點算？」
呢個係佢最大顧慮
我話：「佢會開心生活，
每日同你喺電話傾偈。」
我想講，佢離開之前嘅性格十足阿婆咁
但返到嚟之後就成隻老虎咁
佢返到嚟，落咗飛機
好似退役士兵咁接受記者訪問
佢應付到全國嘅傳媒
就好似一位明星咁
我六個月之後返去搵佢
問佢老公去咗邊
佢話：「唔知去咗邊度滾，
但我懶得理。」
（笑聲）
成功嘅案例
（笑聲）
（掌聲）
最後，我想講
你唔使去出邊先揾到解決方法
聽下周圍嘅人嘅建議
佢哋總會畀到解決方法你
而且全世界都揾到呢啲人
所以你唔使煩惱
唔好聽世界銀行講
聽實實在在、唔離地嘅普通人講
佢哋知道點樣解決問題
最後我引用聖雄甘地一句話
「佢哋開頭忽視你，
然後嘲笑你，
繼而同你爭，
最後你就係贏家。」
多謝大家
（掌聲）