幾年前，我聽過一個好有趣嘅傳言： 一間大型寵物食品公司嘅老總 會喺年度股東大會度 當眾食一罐狗糧 佢想通過呢種方式嚟說服股東 既然佢敢食狗糧 咁股東啲寵物就更加可以放心食 呢種依家畀稱為「內部測試」嘅策略 已經成為商界嘅一種常用策略 佢唔係叫大家都去食狗糧 係指商人會通過使用自己嘅產品 去證明同表明 佢哋對自己嘅產品有信心 依家，呢種策略已經得到廣泛嘅應用 但係我覺得真正有趣嘅係 呢個策略唔係萬能嘅 因為有啲生意或者有啲商人 係唔用自己嘅產品 而且呢種情況仲喺一個產業中比比皆是 甚至形成咗一種常態 講嘅就係以屏幕為基礎嘅科技產業 2010 年蘋果發佈會，喬佈斯 將 iPad 稱為一款「超凡」產品 「你將體驗前所未有嘅 比手提、智能手機仲要好嘅瀏覽經歷 暢快到令你難以置信。」 幾個月之後 一名來自紐約時報嘅記者去採訪佢 佢哋講咗好長嘅一通電話 電話結束之前 記者問咗啲一個好似放水嘅問題 「你嘅細路仔一定好鍾意 iPad。」 答案似乎必然係肯定嘅 但喬佈斯嘅回答就令人大跌眼鏡 佢反而覺得好意外 佢話「佢哋仲未用 iPad。 我哋屋企限制細路仔 接觸科技嘅時間。」 呢種情況喺科技界好常見 事實上，矽谷附近有間 叫做 Waldorf School of the Peninsula 嘅學校 學生直到八年級先至用觸屏產品 有趣嘅係 其中有 75% 嘅學生家長 都係矽谷嘅技術高管 所以當我聽聞呢件事之後 我覺得既有趣又驚奇 而佢又促使我去思考 到底觸屏產品對我 對我家人、我愛嘅人 對大部份嘅人到底有乜影響 所以喺過去五年間 作為一名商業同心理學教授 我一直喺度研究 觸屏產品對我哋生活嘅影響 我先計下佢哋消耗咗我哋幾多時間 然後再討論我哋用呢段時間做咗咩 我哋就揀一個平常嘅工作日 按佢有 24 小時噉計 我哋揾咗三個嘅時間點 2007 年， 即係 10 年前 2015 年 同我上個星期啱收集咗數據嘅 2017 年 好多嘢都冇點變 我哋仲係每日瞓大概 7 個半到 8 個鐘 有人話，睡眠時間輕微減少咗 但實際冇好大變化 我哋每日做 8 個半到 9 個鐘嘅工 仲有啲日常活動 譬如食飯、沖涼、湊細路仔 每日要花費三個鐘 咁仲剩低一啲空間 我哋嘅個人時間 呢段時間對我哋非常重要 因為我哋可以做一啲個人嘅嘢 我哋可以因此培養興趣 發展親密關係 真正思考人生，變得富有創造力 自我反省，完善自身，解決問題 令我哋嘅人生變得有意義 當然，工作都有咁嘅作用 但係當人喺生命嘅盡頭 回顧自己嘅一生個時 佢哋臨終所講嘅 都同個人時間有關 所以個人時間係好神聖嘅 對我哋好重要 依家，我要做嘅就係話畀你哋知 隨著時間嘅推移 觸屏產品佔用咗我哋幾多個人時間 2007 年 係咁多 呢年蘋果公司發佈咗第一部 iPhone 八年之後 係咁多 依家，係咁多 呢啲就係我哋對住屏幕嘅時間 呢個黃色區域，條細銀線 係魔法發生嘅地方 代表住你本人嘅特質 依家，呢個區域好細 咁我哋要點做？ 第一個問題就係： 個紅色區域似咩？ 當然，觸屏產品宜家喺好多方面 都創造咗奇跡 我喺紐約生活 而我有好多親戚喺澳洲 我有個一歲大嘅仔 佢通過屏幕嚟識得啲親戚 呢個係我 15 或者 20 年前 冇辦法做到嘅 觸屏產品確實帶來咗好多好處 你能夠做嘅一件事就係問自己： 喺嗰段時間到底發生咗咩？ 嗰啲應用程式到底 令我哋嘅生活豐富咗幾多？ 而有啲確實係嘅 如果你喺人們用緊應用程式陣時 叫停佢哋，問 「話畀我知你依家覺得點啊？」 如果用緊有關放鬆、 鍛煉、天氣 閱讀、教育、健康嘅應用程式 佢哋會話感覺良好 佢哋平均每日每個應用程式用九分鐘 而有啲應用程式就會令到佢哋冇咁開心 大概一半嘅人，當你打斷佢哋問： 「你覺得點啊？」 佢哋會講唔係咁開心 有趣嘅係，呢啲應用程式係有關 約會、社交網絡、遊戲 娛樂、新聞、網頁瀏覽 人們每日平均每個應用程式 用二十七分鐘 我哋用多兩倍嘅時間嚟令到自己唔開心 咁似乎唔係咁明智 我哋之所以用咁多時間喺 令自己唔開心嘅應用程式 係因為佢哋令我哋停唔落嚟 停止信號遍佈 20 世紀嘅每一個角落 一個停止信號主要就係叫我哋 去做一啲新嘅、唔同嘅嘢喇 你諗下，將份報紙睇到尾 你就折好份報紙，放埋一邊 雜誌、書本都係咁 當你睇完一章內容 你就會去諗跟住要做啲乜 你去睇電視，個節目會結束 你就要等成個星期先至有下一集 停止信號無處不在 但係我哋今日接觸嘅媒體 係冇停止信號嘅 動態消息不斷湧入 一切都變得無窮無盡： Twitter、Facebook、Instagram 郵件、短信、新聞 當你真係要睇曬全部來源嘅信息 你就會一直一直睇下去 至於要點應對 我哋可以從西歐得到一啲啟示 佢哋似乎喺工作方面有一啲成效 舉一個例子 呢個係一間荷蘭設計公司 佢哋嘅做法就係 每日下午六點準時將辦公台升到天花板 無論你係發緊郵件或者咩 張辦公檯都會畀升到天花板 （笑聲） （掌聲） 每個星期有四日 辦公室變成一個瑜伽館 每個星期有一日，辦公室變成舞吧 由你嚟決定放工後參加咩活動 但呢個真係一個好好嘅停止信號 因為咁意味住喺每日嘅結尾 一切都要停止，無辦法再去工作 一間叫 Daimler 嘅德國汽車公司 採用咗另一種策略 喺你度假個時 佢哋唔講「呢個人度緊假， 等佢返嚟就會回覆你。」 而係講「呢個人度緊假， 所以我哋刪咗你份郵件， 佢永遠都唔會睇到你啱發嗰份郵件。」 （笑聲） 「你可以幾個星期后再發一次， 或者乾脆發郵件畀其他人。」 （笑聲） 咁所以 （掌聲） 你可以想像一下呢種情況 你去度假，咁你就係真真正正咁度假 呢間公司嘅員工覺得 佢哋係真正放低工作，得到休息 當然，我哋仲唔係好清楚 平時喺屋企要點做 我想畀大家一啲建議 好簡單，就係我打算下午五點到六點 都唔掂我部手機 問題係，每日嘅下午五點到六點都唔同 我諗咗一個更好嘅策略 我每日都會做一啲嘢 而其中一啲係每日固定嘅 譬如食晚餐 有時我一個人食 有時同其他人一齊食 有時喺餐館食 有時喺屋企食 但係我嘅原則唔變： 絕對唔喺食飯時睇手機 要將部手機放遠啲 越遠越好 因為我哋真係對誘惑毫無抵抗力 但係你知要停低 所以每次晚飯開餐 我都會將部手機放到好遠 避免曬所有誘惑 一開始好痛苦 因為我有好嚴重嘅「錯失恐懼癥」 （笑聲） 我掙扎過 但最後我竟然習慣咗 就好似戒毒時克服毒癮咁 然之後，生活就變得更加豐富多彩 更加有趣 你可以更加好咁溝通 你真正同你身邊嘅人聯繫起來 我覺得呢個係一個絕佳嘅策略 我哋知道咁樣有用，我追蹤過好多人 當佢哋咁做時—— 呢種作用仲放大咗 佢哋感覺非常良好 從每日早晨嘅第一粒鐘開始自律 佢哋開始喺週末將手機調到飛行模式 嗰時，你部手機就唔再係一部手機 而係一部相機 咁真係一個好好嘅方法 我哋清楚大家會因此覺得生活更加美好 咁到底重點係咩呢？ 我講過，觸屏產品係好神奇嘅 我都覺得確實係咁 但係我哋依家嘅處境就好似 開著一架車喺一條無盡頭嘅路上狂奔 似乎好難踩到刹車 你面前有兩種選擇 你可以任由美景喺眼前飛逝 剩係講句「好靚嘅海景啊」 再透過車窗匆匆影幾張相 咁好容易 或者你可以離開公路，泊車埋邊 踩腳刹車 落車 除低鞋襪 喺沙灘上漫步 感受沙粒帶來嘅觸覺 走向大海 等海水纏繞你嘅腳踝 你嘅生活會變得更加豐富、有意義 因為你體驗咗新嘅經歷 因為你將部手機留喺架車度 多謝！ （掌聲）