Tai, īsadūmuojotīs, kai stuovot nazkur Amerikā iz ūļneicas,

i pi jiusim daīt japanīts i prosa:

„Atlaidit, kai sauc itū kvartalu?”

Jius atsaceijat: „Atlaidit. Nu, itei ir Oukstrita, tei ir Elmstrita.

Tei ir 26. sāta, tei — 27.”

„Lobi,” jis atsacej, „a kai sauc itū kvartalu?”

I jius atsokat: „Nu, kvartalim nav pasauku.

Pasaukys irā ūļneicom; kvartali ir tik

vītys bez pasaukom iz vyds ūļneicu.”

Jis nūīt drupeit pasagaisynuojis i apsamuonejs.

Tān īsadūmuojotīs, kai stuovat iz ūļneicas nazkur Japanejā,

jius pasagrīžat pret sūpluok byunūšū cylvāku i vaicojat:

„Atlaidit, kai sauc itū ūļneicu?”

Jis atsoka: „Nu, itys irā 17. kvartals, itys — 16. kvartals.”

I jius atsokat: „Lobi, i kai sauc itū ūļneicu?”

I jis atsoka: „Nu, ūļneicīm nav pasauku.

Pasaukys irā kvartalim.

Pasaverit Google Maps. Vei, 14.,15., 16., 17., 18., 19. kvartals.

Vysim kvartalim irā pasaukys.

Ūļneicys irā tik vītys bez pasauku vydā kvartalu.

I tod jius vaicojat: „Lobi, a kai tod jius zynit sovu sātys adresi?”

„Vīnkuorši,” jis atsoka, „itys ir ostotais kvartals.

Es dzeivoju 17. kvartalā, sātā numer vīns.”

„Lobi,” jius sokat, „a, staiguojout pa apleicīni,

es īvāruoju, ka sātu numeri nav seceigi.”

Jis atsoka: „Skaidrys, ka irā. Tuos ir numereitys piec tū pastateišonys seceibys.

Pyrmuo kvartalā pastateituo sāta ir sāta numer vīns.

Ūtrei pastateituo sāta ir sāta numer div.

Trešuo ir sāta numer treis. Vīgli! Logiski!”

Deļtuo maņ pateik, kai myusim ir

kod nakod juosalaiž iz ūtru pasauļa molu,

kab atmaneitu pījāvumus, kurus mes agruok nazynuojam

i atmaneitu, kai taipoš i preteimeiba var byut pareiza.

Tai, pīvadumam, Kinejā uorsti tur,

kai jū dorbs ir ryupētīs, kab tu byutu vasals.

Deļtuo sevkuru mienesi, kuru asat vasals, jius jim moksuojot,

i, kod asat navasals, jiusim navajag jīm moksuot, deļtam ka jī nav kuorteigi darejuši

sovu dorbu. Jī tīk bogotuoki, kod jius asat vasali, a na navasali.

(Plaukšīni)

Leluokajā daļā muzykys mes skaitom „vīns”

kai pyrmū sitīni, muzykalys frazys suokys. Vīns, div, treis, četri.

Tok Vokoru Afrikys muzykā „vīns”

teik skaiteits par frazys beigom,

taipoš kai punkts sacejuma golā.

Tū var dzierdēt na tik frazejumā, bet taipoš i tymā, kai jī skaita ritmu.

Div, treis, četri, vīns.

Taipoš i itei karta ir preciza.

(Smīklys)

Ir pasacīņs, ka, vysleidz kaidu patīsu lītu jius pasaceitu par Indeju,

taipat i pretemeiba byus patīseiga.

Deļtuo naaizmierssim, vysvīns, voi TED voi vysur cytur,

ka, vysleidza kaidys genialys idejis ir jyusim voi cytim,

taipat i preteimeiba var byut patīseiga.

Lels jiusim paļdis!