ကျွန်တော်ဟာ ဒီညအတွက် ဘလော့ဂ်ကို ရေးဖို့ ကြိုးစားနေတယ်၊ တကယ့်ကိုပဲ ကျွန်တော်ဟာ အကျဉ်းထောင်ထဲကို သွားခဲ့ပြီး ချစ်စရာကောင်းတဲ့ အကျဉ်းသား တသီကြီးကို ပွေ့ဖက်လိုက်ရတယ်၊ အဲဒီအချိန်မှာပဲ အလုပ်များနေတဲ့ DJ တယောက်က ဓာတ်ပြားတချို့ကို လှည့်ကစားနေစဉ်၊ Richard Branson ကျတော့ ဘိန်းဖြူကို ဘယ်မှာ ရနိုင်ကြောင်းကို ပြောပြခဲ့တာ တကယ်လို့ ထင်စရာရှိပါတယ်။ (ရယ်မောသံများ) (လက်ခုပ်တီးသံများ) တကယ့်အဖြစ်နော်! (ရယ်မောသံများ) သင်ခန်းစာ နံပါတ် တစ်- ခင်ဗျားတို့ကို လုပ်ပိုင်ခွင့်အာဏာ မပေးတဲ့ ဟောကိန်းကို ဘယ်တော့မှ မယုံကြည်ပါနဲ့။ ကျွန်တော် မွေးတုန်းက ဆရာဝန်တွေက ကျွန်တော့ အသက် ၂၄ နာရီမပြည့်မီမှာကို သေသွားလိမ့်မယ်လို့ ကျွန်တော့မိဘတွေကို ပြောခဲ့ကြပါတယ်။ ၃၅ နှစ်ကြာလာလို့ ဒီနေ့တွင် အဲဒီဆရာဝန်တွေ အားလုံး သေသွားကြပြီ၊ (ရယ်မောသံများ) ကျန်ရစ်ခဲ့တဲ့ ဆရာဝန်ဆိုလို့ ကျွန်တော် တယောက်တည်းပါပဲ။ (ရယ်မောသံများ) (လက်ခုပ်တီးသံများ) ခင်ဗျားတို့ကို လုပ်ပိုင်ခွင့်အာဏာ မပေးတဲ့ ဟောကိန်းကို ဘယ်တော့မှ မယုံကြည်ပါနဲ့။ ခင်ဗျားတို့ရဲ့ ဘဝတခုလုံးမှာ အပြောခံခဲ့ရတဲ့ ဟောကိန်းတွေ ဘယ်လောက်များခဲ့လဲ? ခင်ဗျားတို့ကို လုပ်ပိုင်ခွင့် အာဏာဘယ်လိုမှ မပေးတဲ့ ဟောကိန်းတွေကို ယုံကြည်ရင်၊ ခင်ဗျားတို့ဟာ ညှိုးနွမ်းလာကာ သေသွားမှာပါ၊ ရုပ်ပိုင်းအရ ဖြစ်စေ၊ စိတ်ပိုင်းအရ ဖြစ်စေ သေသွားမှာဖြစ်ပြီး ခင်ဗျားဟာ ဘောင်တခုပေါ်မှာ တပ်ဆင်ပေးထားတဲ့ ထုထယ်ကြီးသဖွယ် အသက်ရှင် လမ်းလျှောက်နေသူ ဖြစ်လာမှာပါ။ ခင်ဗျားတို့ဟာ ခင်ဗျားတို့ရဲ့ ဘဝတလျှောက်မှာ နာမည်ဂုဏ်ထူးတွေ အမျိုးမျိုး ပေးခံရပါ့မယ်၊ ပြီးတော့ အမျိုးမျိုးသော အရာတွေကို ခင်ဗျားကို ပြောပြကြပါလိမ့်မယ်။ ဒါပေမဲ့ ခင်ဗျားတို့ဟာ လုပ်ပိုင်ခွင့် အာဏာကို ပေးမယ့်ဟာကိုသာ ယုံကြည်ရပါမယ်။ ကျွန်တော့ တသက်လုံးမှာ ကျွန်တော့ကို လုပ်ကျွေးလာခဲ့ကာ၊ ကျွန်တော့ထံမှနေပြီး ရယူကြမယ့်သူတွေ အားလုံးတို့ကပါ၊ အဲဒါကို မသိတောင် အကျိုးစီးပွားတွေကို ခံစားနိုင်ကြမှာပါ။ ပြီးတော့ ကျွန်တော် ဒီနေ့ဒီမှာ ရှိနေတာက ဘဝထဲက အခက်အခဲတွေ အကြောင်းကို ပြောပြဖို့ မဟုတ်သလို၊ ခင်ဗျားတို့ရဲ့ အခက်အခဲတွေကို သိပါတယ်လို့ မပြောချင်ပါ။ ခင်ဗျားတို့ရဲ့ ဘဝထဲ ဘယ်လို အခက်အခဲတွေကို ဖြတ်ကျော်နေရကြောင်း ကျွန်တော် လုံးဝ မသိရပါ။ အဲဒီထက်ပိုလို့၊ ခင်ဗျားတို့ရဲ့ အနီးအနားမှာ ကျွန်တော် ကြီးပြင်းလာခဲ့တာလည်း မဟုတ်ပါ။ ကျွန်တော့ဆီမှာ ခင်ဗျားတို့လို မိဘတွေမရှိ၊ ခင်ဗျားတို့ခန္ဓာကိုယ်ထဲမှာ နေနေတာ မဟုတ်ပါ။ ခင်ဗျားတို့ ဘဝထဲမှာ ဖြစ်ပျက်ခဲ့တာ ကျွန်တော့ဆီမှာ မဖြစ်ပျက်ခဲ့ကြပါ။ ကျွန်တော်ဟာ ပါရဂူပါလို့ ကိုယ့်ကိုကိုယ် ပြောနိုင်တာ တခုတည်းကတော့ ကျွန်တော်ရဲ့ ဘဝပါ၊ ကျွန်တော် အဲဒါကို တကယ့်ကောင်းကောင်းသိသူပါ။ (လက်ခုပ်တီးသံများ) ဒါပေမဲ့ အဲဒါကို ရယူခဲ့ရတာဟာ မလွယ်ကူခဲ့ပါ၊ ကျွန်တော် ဖြတ်သန်းခဲ့ရတာတွေကို ခင်ဗျားတို့ကိုပါမဖြတ်သန်းစေလိုပါဘူး။ ကျွန်တော်ဟာ သတိရနေစဉ် အရိုးခြင်ဆီများထဲက သတ္ထုအတန်းတွေ ထုတ်ခံခဲ့ရတယ်၊ မေးရိုးထဲ ကူးစက်ရောဂါ ဖြစ်ခဲ့လို့ သွားတွေကို နှုတ်ယူခဲ့ရတယ်၊ ကျွန်တော်ဟာ ကျွန်တော့ အစားအစာတွေကို ဝါးမျိုးမရတော့ပါဘူး။ ပြီးတော့ ကျွန်တော့ကို မနက်တိုင်းမှာ နှိုးပေးတာကအစ ရေချိုးခြင်းနဲ့ ပြုစုစောင့်ရှောက်မှုကို အခြားသူ တယောက်က လုပ်ပေးရပါတယ်၊ ကျွန်တော် လပ်ထပ်ထားတဲ့ ကျွန်တော့ဇနီးချောက အဲဒါတွေ လုပ်ပေးနိုင်တယ် ကံကောင်းတာပေါ့။ (လက်ခုပ်တီးသံများ) စစချင်းမှာ ကျွန်တော် သွားလေရာ နေရာတိုင်းမှာ၊ လူတွေနဲ့ စပြီးတွေ့တွေ့ချင်းမှာ၊ သူတို့က ကျွန်တော့ ဘဝအထ္ထုပတ္တိကို မသိကြဘူးဆိုရင်၊ လူသားတို့ရဲ့ သဘာဝအရ သူတို့ဘာသာသူတို့ အလိုအလျောက်၊ "အို၊ ဒီလိုလူဖြစ်ရတာ သိပ်ကို ခက်ခဲမှာပဲ!" လို့ ထင်မိတတ်ကြပါတယ်။ လူတယောက်ဟာ ကျွန်တော့ကို သနားနေရင် ထိုသူဟာ အချိန်ကို အလကားဖြုန်းနေခြင်းပါပဲ၊ ဘာဖြစ်လို့လဲ ဆိုတော့ ကျွန်တော် အားကောင်းတဲ့ ဘဝကို ရွေးချယ်ထားသူမို့လို့ပါ၊ ခင်ဗျားတို့ကိပါ အားကောင်းတဲ့ ဘဝကို ရွေးနိုင်အောင် ကူပေးဖို့ လာခဲ့တာပါ၊ ဒီမှာ ကျွန်တော်တို့ဟာ ဒီနေ့ ဆေးတွေ အကြောင်းကို ပြောဆိုခဲ့ကြပါသေးတယ်။ လူသားတွေကို တကယ်နှိပ်စက်နေတဲ့ အဆိုးဝါးဆုံး ဆေးက ဘာလဲ ခင်ဗျားတို့သိလား။ သနားမှုပါ။ ခင်ဗျားတို့က အခြားလူတယောက်ကို သနားမိတာနဲ့၊ ဒါမှမဟုတ် ခင်ဗျားတို့ဟာ ကိုယ့်ကိုကိုယ် သနားမိတာနဲ့ ခင်ဗျားတို့ ကိစ္စတုံးသွားပါပြီ။ ခင်ဗျားတို့ရဲ့ လုပ်ကိုင်နိုင်စွမ်းတွေဟာ လုံးဝ အပြည့်အဝ ပျက်သုဉ်းသွားပါပြီ။ ကျွန်တော်တို့ဟာ ကိုယ့်ကို သနားလို့မရဘူး၊ ကျွန်တော်တို့ဟာ ခင်ဗျားကို သနားလို့ မရဘူး။ ကျွန်တော်ဟာ ဒီနေ့ အိမ်ကို ပြန်ဖို့လိုတယ်၊ လွတ်လပ်မှုကို ခံစားနိုင်တာ မှန်ပေမဲ့၊ ကျွန်တော် ဒီနေ့ ခင်ဗျားတို့ကို ပြောပြလိုတဲ့ လွတ်လပ်မှုကျတော့၊ ကျွန်တော်က လွတ်လပ်မှုအဖြစ် လက်ခံရန် ရွေးခဲ့တဲ့ လွတ်လပ်မှုဆိုတာက၊ ကျွန်တော် ပြောခဲ့သလို၊ ကျွန်တော်တို့ကို လုပ်ပိုင်ခွင့်အာဏာ မပေးတဲ့ ဟောကိန်းကို ဘယ်တော့မှ ယုံကြည် မရပါဘူး! ဒီနေ့ မှတ်ယူရမယ့် ဒုတိယအချက်က ခင်ဗျားရဲ့ အခြေအနေဟာ ခင်ဗျားရဲ့ ဘဝ မဟုတ်စေရပါ။ အဲဒီလို လုံးဝ မဟုတ်စေရပါ။ ကျွန်တော်ဟာ မသန်စွမ်းသူ မဟုတ်ပါ! ဒါပေမဲ့ ကျွန်တော်ဟာ မသန်စွမ်းသူတို့အတွက် ကားထားရုံဆိုင်ရာ အခွင့်ထူးကိုတော့ ယူမှာပေါ့ (ရယ်မောသံများ) ဒါပေမဲ့ အဲဒီအချက်က ကျွန်တော့ကို လူသားအနေနဲ့ ဆုံးဖြတ်တာ မဟုတ်ပါ။ မသန်စွမ်းသူတဲ့လား။ ကျွန်တော့ကို တသက်လုံး မသန်စွမ်းသူအဖြစ် သုံးသပ် ဆက်ဆံခံခဲ့ရပါတယ်။ အဲဒါနဲ့ ကျွန်တော်ဟာ တခုတည်းသော မသန်စွမ်းမှုမှာ လိုက်ဖက်အောင် မနေထိုင်တတ်မှုသာ ဖြစ်တာကို သူတို့ကို ရှင်းပြလာရပါတယ်။ ခင်ဗျားတို့ရဲ့ ဘယ်ဝန်းကျင်မှာမဆို လိုက်ဖက်အောင် ပြုလုပ်နိုင်ရပါမယ်။ ထောင်ထဲမှာတောင် လုပ်လို့ ရနိုင်တယ်။ လိုက်ဖက်အောင် နေမှုဟာ ဘာနဲ့ တူသလဲ။ အဲဒါဟာ အောင်ပွဲခံယူလိုက်သလိုပါပဲ။ ကိုယ့်ဘဝကိုကိုယ် အောင်ပွဲခံယူနိုင်ကြတဲ့ လူတွေနဲ့ ကျွန်တော်တို့ တွေ့ကြရင်၊ ကျွန်တော်တို့ဟာ သူတို့ကို ဝန်းရံတတ်ကြတယ်၊ သူတို့ဆီမှ သင်ယူလိုကြပါတယ်။ ကြည့်ကြစမ်းပါ! ကျွန်တော်တို့ကို ထောင်ကျနေသူ၊ အပြစ်ကျူးလွန်သူလို မမြင်စေလိုရင် ဒီထဲကနေပြီး ကိုယ်က ထွက်နိုင်ခဲ့တယ်၊ ဒါမှမဟုတ် အဲဒီထဲ ဆက်ပြီး ရှိနေသေးတောင်၊ စိတ်ထဲမှာ ခံယူချက် တခုရှိတတ်တယ်၊ ကျွန်တော်တို့ဟာ လူသားမျိုးနွယ် အတွက်၊ ကျွန်တော်တို့ အခြေအနေ၊ ဂုဏ်ထူး၊ ရပ်တည်မှု ဘယ်လိုပဲရှိရှိ၊ တန်ဖိုးရှိတာကို ယူဆောင်ပေးနေတယ်ဆိုတဲ့ ယုံကြည်ချက်ပါ။ တကယ်လို့များ ကျွန်တော်ဟာ မသန်စွမ်းဘူးလို့ ယုံကြည်မိရင်၊ ကျွန်တော် ကိစ္စတုံးသွားပြီ၊ ရှက်နေတော့မယ်၊ လုံခြုံမှာ မဟုတ်တော့ပါ၊ ကြောက်နေမယ်၊ အကူအညီကို ရှာလာမယ်။ ကျန်တဲ့ လူသားအားလုံးတို့ဟာ အဲဒါကို အိုကေ ဖြစ်နိုင်ကြပေမဲ့၊ ကျွန်တော်ကတော့ နောက်တမျိုးကို ရွေးပါတယ်၊ ကျွန်တော် အားကောင်းလို ဖြစ်ဖို့ကို၊ ခေါင်းဆောင် ဖြစ်ဖို့ကို ရွေးလိုက်တယ်၊ ကျွန်တော်တို့ ကမ္ဘာဂြိုဟ်ကြီးကို ရှေ့ကို တွန်းပေးမယ့် စကားလုံးတွေကို ရွေးပါတယ်။ ကျွန်တော် မွေးခဲ့တာ ဘာ့အတွက်လဲ ပြောပြပါမယ်။ အဲဒါက ခင်ဗျားတို့ ဘာ့အတွက် မွေးခဲ့တဲ့ဆိုတာ ရှာကြံလာစေမယ်လို့ မျှော်လင့်ပါတယ်။ ဒီကမ္ဘာကြီးကို မလုံမခြုံဖြစ်ရမှုမှ ကယ်တင်ပေးဖို့ ကျွန်တော် မွေးခဲ့ရတာပါ။ လူတယောက် မလုံခြုံဘူးဆိုရင် မိုက်မဲတဲ့ အရာတွေကို လုပ်မိနိုင်တယ်။ ကျွန်တော်တို့ဟာ မလုံမလဲခံစားရရင်၊ အပြင်မှာ ရှိတဲ့ တန်ဖိုးတွေကို၊ ပြီးတော့ အပြင်မှာ ရှိနေတဲ့ အရာတွေကို ရယူဖို့ ကြိုးစားရင် ကိုယ့်ကိုကိုယ် အဟုတ်ကြီးဆိုပြီး ပြသလိုကြပါတယ်။ (လက်ခုပ်တီးသံများ) ကျေးဇူးတင်ပါတယ်။ ခင်ဗျားတို့ဟာ ပြည့်စုံလုံလောက်ကြပါတယ်။ ကျွန်တော်ဟာ အထူးကုဆရာ တဦးအဖြစ် လူတွေအားလုံးကို၊ သူတို့ဘာပဲ လုပ်ခဲ့လုပ်ခဲ့၊ မေတ္တာထားရန် ကတိပေးခဲ့ပါတယ်။ ဘာဖြစ်လို့လဲဆိုတော့၊ အတွင်းဖက်ကို နက်ရှိုင်းစွာ ကြည့်လို့ တွေ့လိုက်တာက၊ လူသားမှန်သမျှဟာ မေတ္တရားတရားကို သိပ်လိုချင်တာကို၊ သူတို့ဟာ ခက်ထန်သူပဲ ဖြစ်ဖြစ်၊ ကြောက်ရွံ့နေသူပဲ ဖြစ်ဖြစ်၊ ဘယ်လိုမှ မလှုပ်ရှားချင်သူပဲ ဖြစ်ဖြစ် လိုချင်တယ်။ ကျွန်တော်တို့က သူတို့ကို မှန်တဲ့အခြေအနေမှာ၊ မှန်တဲ့ အချိန်မှာ၊ တွေ့နိုင်ရင်၊ အမှန်တရားကို သူတို့ ပြောပြကြမှာပါ။ သူတို့ဟာ မေတ္တာကို လိုအပ်နေကြလို့ပါ။ သူတို့က မေတ္တာထားစေလိုတာက ဘသူ့ဆီကများလဲ ခင်ဗျားတို့ သိလား။ မိခင်များဆီက မဟုတ်၊ ဖခင်များဆီက မဟုတ်၊ စောင့်ရှောက်ပေးနေသူထံမှ မဟုတ်ပါ။ အဲဒီလို သူတွေဆီကမှ မဟုတ်ပါ။ သူတို့ဟာ ကြည့်မှန်ထဲကို ကြည့်နိုင်ပြီး ကိုယ့်ကိုကိုယ် မေတ္တာထားလိုကြတာပါ။ ခင်ဗျားတို့က အဲဒီအချက်ကို နားလည်ကြပြီဆိုရင် တခုခု လုပ်လို့ ရမှာပါ။ (လက်ခုပ်တီးသံများ) ခင်ဗျားတို့ဟာ ကိုယ့်ကိုကိုယ် ဝမ်းနည်းမိသလို ခံစားလို့ မရနိုင်ပါ။ ခင်ဗျားတို့ဟာ ကိုယ့်ကို ဝမ်းနည်းသူဖြစ်ရင် ခင်ဗျားရဲ့ ကိစ္စတွေ ပျက်သုဉ်းသွားတော့မှာပါ။ သတိထားရမယ့် ကိုယ့်ကိုဝမ်းနည်းမှုရဲ့ ဆန့်ကျင်ဘက် အချက်လည်း ရှိပါသေးတယ်၊ အဲဒါက နောက်အစွန်တခုဖြစ်ပြီး ကျွန်တော်က ကိုယ့်ကိုကိုယ် အနိုင်ကျင့်မှုလို့ ခေါ်တယ်၊ ကိုယ့်ကို ရိုက်နှက်နေသူ၊ ကိုယ့်ရဲ့ ရန်သူ ဖြစ်ကာ ကိုယ့်ကိုကိုယ် အနှုတ်လက္ခဏာ ဟောကိန်းတွေ အားလုံးဟာ မှန်တယ်၊ အဲဒါတွေ ဖြစ်လာကြမယ်၊ မင်းတော့ ကိစ္စချောပြီ၊ ကျဆုံးမှာ သေချာတယ်လို့ ပြောဆိုမှုပါ။ ဒီလိုသာဆိုရင် ခင်ဗျားဟာ ဘာမှ လက်လှမ်းမှီမှာ မဟုတ်ပါ။ ကိုယ့်ကို နှိပ်စက်မှုဟာ ကိုယ့်ကို ပြုလုပ်နိုင်တဲ့ အကြီးဆုံး အန္တရာယ်ပါ။ ခင်ဗျားတို့ဟာ ကိုယ့်ကို သနားခွင့် မရှိဘူး၊ ကိုယ့်ကိုကိုယ် နှိပ်စက်ခွင့် မရှိဘူး၊ ခင်ဗျားတို့ဟာ ကိုယ့်ကိုကိုယ် မေတ္တာထားဖို့လိုတယ်၊ ဒါဟာ ကျွန်တော် ဒီနေ့ မျှဝေပေးမယ့် နောက်ဆုံး အကြံပေးချက်နဲ့ဆိုင်တယ်၊ တကယ့် အကျဉ်းထောင်ဆိုတာ တံတိုင်ကြီးတွေနဲ့ဟာ မဟုတ်ဘူး၊ လျှပ်စစ်သံဆူးကြိုးတွေနဲ့ ကာထားတာမျိုး မဟုတ်ဘူး၊ တကယ့် ထောင်ထဲမှာ အစောင့်တွေ မရှိကြဘူး၊ အဲဒီ တကယ့်အကျဉ်းထောင်က ဟောဒီထဲမှာပါ။ ကျွန်တော်တို့ အားလုံးဆီမှာ အဲဒါရှိပါတယ်၊ ကျွန်တော်တို့ဆီမှာ ကျွန်တော်တို့နဲ့ မရပ်မနား စကားပြောတဲ့ အသိစိတ် ရှိပါတယ်။ ခင်ဗျားတို့ရဲ့ ကယ်တင်မှုက ဘယ်မှာလဲ သိကြလား။ ဒီနံရံတွေရဲ့ အပြင်မှာ မဟုတ်ဘူး။ ကျွန်တော်ဟာ သိပ်ကို အောင်မြင်ကြကာ နာမည်ကြီး ပုဂ္ဂိုလ်တွေ မနည်းကြီးကို တွေ့ခဲ့ဘူးတယ်၊ သူတို့ဟာ အကျဉ်းထောင်ထဲမှာ ရှိနေကြတယ်၊ သူတို့ဟာ သူတို့ရဲ့ အသိစိတ်ထဲမှာ ဖမ်းမိနေကြတယ်၊ ကိုယ့်ကိုကိုယ် နှိပ်စက်ရင်း၊ ကိုယ့်ကိုကိုယ် သနားရင်းနဲ့ ပေါ့လေ။ စစ်မှန်တဲ့ လွတ်လပ်မှုက အဲဒီအသိစိတ်ထဲမှ ထွက်လာနိုင်မှ ရရှိနိုင်မှာပါ။ ပြီးတော့ ကျွန်တော် ဇနီး သင်ပေးသလို အဲဒါဟာ ခင်ဗျားတို့နှလုံးသားထဲ ရောက်ဖို့ လိုတယ်။ နှလုံးရဲ့ စည်းချက်ကျကျ ခုန်မှုဟာ သွေးတွေကို အစွန်အဖျား နေရာများဆီ ရောက်အောင် တွန်းပို့နေရုံသာ မကပါ။ နှလုံး ဘာတွေများ လုပ်နေသေးလဲ။ ကျွန်တော်တို့ရဲ့ နှလုံးဟာ ကျွန်တော်တို့ရဲ့ ပြုမူမှုဆိုင်ရာ၊ ဘဝဆိုင်ရာ၊ စိတ်နေသဘောထားဆိုင်ရာ ရွေးချယ်စရာ စေ့ဆော်ချက်တွေကို စေလွှတ်ပေးနေတာပါ။ ခင်ဗျားတို့က ကိုယ့်ကိုကိုယ် မေတ္တာရှိကြမယ် ဆိုရင်၊ ခင်ဗျားတို့ဟာ အိမ်မောကျနေလား၊ ထောင်ထဲက ခုတင်ပေါ်မှာလား၊ ခမ်းနားတဲ့ အိမ်ထဲမှာလား၊ ဗိုက်ဝနေတာလား၊ နောက်တခါ ဘယ်တော့ စားနိုင်မလဲ ဆိုတာကို မသိသူလား၊ ကိုယ့်ကိုကိုယ် မေတ္တာရှိရိုးမှန်ရင်၊ ကိုယ့်စိတ်ထဲက ခံစားချက်တွေကို ကျွမ်းကျင်စွာ ကိုင်တွယ်နိုင်အောင် သင်ယူနိုင်မယ်ဆိုရင်၊ ခင်ဗျားဟာ တကယ့်ကို လွတ်လပ်သူ ဖြစ်လာမှာပါ။ ကျွန်တော် ခင်ဗျားတို့ကို ချစ်တယ်၊ တယောက်ချင်းကို ချစ်တယ်၊ ဒီနံရံတွေထဲမှ ခင်ဗျားတို့ လွတ်လပ်လာပါကြပါစေ။ ဘုရားသခင်က ကောင်းချီးမင်္ဂလာ ချီးမြှောက်တော်မူပါစေ။ (လက်ခုပ်တီးသံများ)