「我腦裏面感覺到有一場葬禮，

而殮葬嘅人不停行嚟行去，

當我嘅感覺返返嚟，佢哋就坐返埋位，

葬禮儀式好似鼓一樣敲打著。

直至我嘅腦完全麻木，

跟住我聽到佢哋移靈安葬我嘅遺體，

而我嘅靈魂就好似木一樣敲碎緊，

仲有佢哋好似之前一樣
鉛一樣沉重嘅腳步，

而成個大嘅空間好似有一個鐘喺度響。

天堂好似一個鐘咁，

而人就好似耳朵，

聽到定時響起嘅鐘聲，

但我同寂靜屬於同一個異端，

都係擱淺喺荒島上，孤零零喺度。

隨著支持我嘅木板斷開，

我不斷墜落， 墜落，

撞到好多嘢然後跌落一個世界，

我唔再認識事物。」

我哋喺好多喑喻裏邊見到抑鬱症

艾米莉 ‧ 狄金森將抑鬱症轉化為文字

戈雅將抑鬱症轉化成油畫

一半嘅藝術創作

係想表達抑鬱症嘅典形狀態

至於我， 我一直認為自己係堅強

如果一班人被咗去集中營嘅話

我會係其中一個可以存活落嚟嘅人

1991 年，我經歷一連串嘅打擊

我母親過世、一段感情結束咗

同埋我結束咗幾年外國生活

返返去美國

而我經歷以上打擊都仍然係好硬淨

但係喺 1994，三年之後

我發覺自己幾乎對所有嘢都冇興趣

我唔想做任何之前想做嘅嘢

我都唔知點解會噉樣

抑鬱嘅反面唔係快樂， 係活力

活力就係嗰時我覺得我失去咗嘅嘢

每日要做嘅嘢實在太多啦

我想返屋企

見到電話答錄機上面閃著紅色燈
我冇咁驚

因為唔使聽到朋友留言

我就諗︰點解我要覆返咁多人嘅電話？

或係我應該要食午餐啦

但我會諗， 我要將食物攞出嚟

擺喺個碟度

又要切、又要擺入個口度，又要吞咗去

感覺好似耶穌行十架嘅路一樣

而有一樣成日喺討論抑鬱症嘅時候

會忽略嘅嘢係

你知道抑鬱症係非常荒謬嘅一件事

你知道當你經歷抑鬱症嘅時候

佢係有幾咁荒謬

你知道大部分人
會聽答錄機嘅留言同食晏

安排好沖涼、出去屋企

呢啲都係好簡單

但當你仍然係喺抑鬱症嘅控制當中

你搵唔到方法解決佢

之後我覺得自己做嘢做得愈嚟愈少

又諗得少、感受又愈嚟愈少

可以話係無能

跟著焦慮嚟勒

如果你話俾我聽之後嗰幾個月

我都要處於抑鬱狀態

我會話︰只要佢十一月完，我就冇問題

但係如果你同我講

我呢幾個月都要極度焦慮

我寧願割腕自殺，好過極度焦慮幾個月

我嗰陣成日都會有一種感覺

好似你行路突然跣襯或者拤倒

而地下快速衝埋你度咁嘅感覺

但係嗰種恐懼感並唔係
剩係跌落地嘅半秒鐘

而係持續咗半年

嗰種感覺令你一直覺得好驚

但你又唔會知道你驚嘅係乜嘢

就喺嗰個時候我開始諗

活著真係太痛苦

而唯一唔自殺嘅理由

就係因為唔想
因為我自殺會傷害到其他人

然後有一日，當我瞓醒

突然間覺得我中風

因為我喺床上完全郁唔到

我望住個電話，諗

「有啲唔對路， 我要打去搵人幫手」

但我連手都遞唔到

噉點拎起電話打呢？

經過四個鐘頭我依煞瞓喺張床

郁都郁唔到

電話響，我用盡力咁攞起個電話

嗰個係我老豆打嚟

我話「 我遇到好大嘅麻煩，

我哋必須諗辦法解決佢。」

第二日我就開始治療同食藥

而我同時諗到一個好弊嘅問題

如果我唔係一個堅強嘅人

可以喺集中營裏面生存嘅人

噉我係乜？

如果我要靠藥物

噉藥物係咪令我做返真正嘅自己？

定係將我變成第二個人？

如果藥物令我變成第二個人

噉我應該有咩感受？

我對抗抑鬱會有兩個好處

第一就係客觀嚟講，我會有好嘅生活

如果當我好返

噉之後就會有更美好嘅嘢等住我

第二樣就係我會得到好好嘅治療

但我好轉又復發，好轉又復發

最後我終於明白

我以後都要靠食藥同治潦生活

我就諗 ，抑鬱症到底
係化學問題定精神問題呢？

需要化學治療定係心理治療？

我搞唔清楚

跟住我明白到

我哋無論呢兩個領域嘅知識
都未夠深入去解釋事物

化學治療同心理治療都有佢哋嘅作用

我同時發覺抑鬱症係一種

同我哋內心深深糾纏著嘅嘢嚟

即係話我哋冇辦法將
佢由我哋人格同個性當中分離

我想講我哋對抑鬱症嘅治療方法
其實係唔係好好

嗰啲治療都唔係好有效

而且仲非常昂貴

有好多數唔曬嘅副作用

呢啲治療嘅禍害好大

但慶幸嘅係我生活喺呢個年代

而唔係五十年前

五十年前面對抑鬱症係束手無策

我希望五十年之後

當人聽到我呢一刻接受過嘅治療

會覺訝異點解會有人接受咁原始嘅科學

抑鬱症喺感情上係一個裂口

如果你今日同某人結婚，然後諗

「如果我老婆過生， 我會搵另一個」

噉樣就唔係我哋所認知嘅愛情

如果冇預料過會失去，噉就唔叫做愛情

預見過絕望係人變得親密嘅原動力

人成日會撈亂三樣嘢︰

抑鬱、哀痛同悲傷

哀痛係好有反應

如果你因為失去某樣嘢而非常唔開心

半年之後你仲係覺得好難過

但比起半年前好咗啲

嗰種應該哀痛

佢自己最後會慢慢消失

如果你經歷過一場浩劫，感覺好慘

六個月後你只能夠僅僅噉捱落去

好可能就係浩劫發生嗰陣

同時引起你嘅抑鬱

噉樣嘅軌跡畀我哋了解到

抑鬱症係一件好嚴重嘅事

人哋覺得抑鬱症就同等於悲傷

但係抑鬱症卻係帶著太多太多嘅悲傷

同埋太多太多嘅哀痛

而一切都係由小事引起

當我開始去了解抑鬱症

開始同一啲曾經患過嘅人傾嘅時候

我發現嗰啲人表現上睇起嚟
有輕微嘅抑鬱

但實際上抑鬱症令佢哋失去咗生活能力

另一邊有批人聽起上嚟
有好嚴重嘅抑鬱

但佢哋卻係兩次病發之間生活得好好

跟著我開始搵出

係乜原因畀令某啲人比另一啲更堅強

係乜嘢機制

令人就算有抑鬱都可以生存落嚟？

跟著我一個又一個咁同曾經抑鬱嘅人傾

其中一個人形容抑鬱症

係一個慢慢死亡嘅過程

一開頭聽到呢種講法係好事嚟

因為佢提醒咗我

慢慢步入死亡真係可以死亡

呢樣嘢係好嚴肅

抑鬱症係全世界第一大
引致失去活動能力嘅疾病

每日都有人因為抑鬱症而離開世界

其中一個喺我了解抑鬱症嘅時候傾嘅人

係我一個認識多年嘅好友

佢喺大學第一年有精神問題

之後惡化成幾多人驚嘅抑鬱症

佢精神好兩極化

即係之後嘅躁狂抑鬱症

經過多年鋰鹽治療

佢復完得相當唔錯

到最後醫生停咗開鋰鹽俾佢

睇下佢可唔可以唔使藥物都得

跟著佢又再度精神失常

仲惡化成我見過最嚴重嘅抑鬱症

佢坐喺佢父母間屋裏面

手腳好硬，坐喺度唔郁

日日都係咁

幾年之後我問佢呢段經歷時

佢已經係詩人同心理治療師
Maggie Robins

佢話︰「我一直重複唱著

Where Have All The Flowers Gone，

令我個腦剩係得呢首歌。

我唱著呢首歌去掩蓋心入邊把聲，

嗰把聲就係

『你係冇用嘅，
你對世界嚟講可有可無。

你根本唔配活喺呢個世界上。』

呢個時候我開始諗住自殺。」

你有抑鬱嘅時候唔會諗

你戴咗一塊灰色面紗

唔會覺得自己係透過負面情緒去睇嘢

你只會認為一塊
代表快樂嘅面紗被人攞走咗

你覺得宜家先係睇到真實嘅世界

同樣係人格分裂嘅病人

內心覺得有嘢需要驅趕嘅一類病人

比較容易治療

但抑鬱類型嘅病人就難啲

因為病人相信佢哋睇到真實世界

但真實世界卻係講緊大話

我成日聽到呢句說話

「但真實世界卻係講緊大話」

當我同抑鬱嘅人傾計嘅時候

我發現佢哋有好多幻覺

佢哋會話「冇人愛我」

然後你同佢講

「我愛你，你老婆愛你，
你媽咪愛你。」

你可以好快咁應返佢哋大部分人

但係抑鬱症嘅人會話

「無論我哋點樣努力，
我哋最後都會死。」

或者佢哋會話

「兩個人之間唔會有真正嘅溝通。

每個人只會畀自己嘅身體困住。」

你只可以回答

「冇錯，但我覺得我哋宜家應該諗，

我哋早餐食啲乜。」

（笑聲）

好多時佢哋表逹嘅並唔係一種病，

而係佢哋睇嘢嘅角度

而佢哋會覺得好特別嘅嘢會係

我哋大部分人都一早知道嘅問題

呢啲問題唔會好令我哋分心

我幾鐘意一個調查

一班抑鬱症病人同一班冇抑鬱嘅人

需要分別玩電子遊戲一粒鐘

當佢哋玩完

佢哋要回答佢哋覺得喺遊戲裏面

殺咗幾多隻怪獸

抑鬱症嗰班人通常講到
10% 之內誤差嘅數字

至於冇抑鬱症嘅人

佢哋估嘅數字

係佢哋真正殺咗數目嘅 15-20 倍

（笑聲）

好多人會話，當我決定寫我嘅抑鬱症

係一個非常困難嘅決定

佢哋問︰

「人哋同你傾計嘅時候會唔會唔同？」

我話︰「係，
人哋同我傾計會有唔同。」

佢哋會同我講佢哋抑鬱症嘅經驗

可能係佢哋家姐、細妹

可能係佢哋嘅朋友

宜家唔同啦因為我知道

抑鬱症每個家庭都曾經有過

前幾年我去咗個研討會

喺嗰個為期三日嘅研討會入面

其中一日，係星期五嚟

其中一個參加者將我拉到一旁
然後佢同我講︰

「我有抑鬱症，呢個病令我覺得尷尬，

但係我一路有食藥。

我剩係想問下你你點樣睇？」

所以我就盡我所能答佢

佢跟住話︰ 「你知嗎？

我老公永遠唔會明白架。

呢樣嘢對佢完全冇意義。

所以， 呢個係我哋嘅秘密。」

我答 ︰「冇問題。」

跟著喺研討會嘅最後一日

佢丈夫又拉埋我一邊

（笑聲）

佢話 ︰「我老婆
如果知道我有抑鬱症嘅話，

絕對唔會覺得我係一個男人。

我有療程，有食藥。
我想知道你點諗？」

佢哋兩夫妻將佢哋同一款藥

收埋喺同一間睡房嘅唔同地方

（笑聲）

我諗佢哋溝通唔係好好

導致一啲問題出現

（笑聲）

同時我都因為佢哋互相提防而覺得辛苦

抑鬱症令人好攰

佢用咗你好多時間同精力

唔理抑鬱症只會令抑鬱症惡化

然後我開始諗抑鬱症患者康復嘅方法

我會由傳統治療開始

我知道只有少數治療
至可以對患者有幫助

好明顯係某幾種方法

有藥物治療

有一啲心理治療

仲可能有電痙攣療法

但其他方法都係冇用

我發現咗一樣嘢

如果你有腦癌

而每朝倒立廿分鐘會令你感覺好啲

可能真係會畀你感覺好啲啦

但係你嘅腦癌從來都冇消失過

你最終都有可能死於腦癌

但如果你有抑鬱症

每日倒立廿分鐘

會畀你感覺好一啲， 噉就真係有效啦

因為抑鬱症係你認知上出現咗問題

你感覺好啲就代表咗你唔再係抑鬱

所以我開始接受其他唔同嘅治療

然後我收到好多患者寄嚟嘅信

講有咩方法對佢哋奏效

就好似今日噉就有人喺後台
問我藥物方面嘅嘢

一個女士曾經寫過一封我係最鐘意嘅

佢話佢曾經嘗試過治療、藥物

所有嘅嘢都試過曬

最後佢搵到一種方法，想我同大家分享

就係用毛冷整唔同嘅小飾物

（笑聲）

佢仲送咗啲佢整嘅作品

（笑聲）

不過我宜家冇帶著佢哋

我叫佢睇一睇

心理醫學診斷同統計手冊裡面

有關強迫症嘅部分

當我搵其他治療嘅時候

我對佢哋了解深咗

我曾經去過塞內加爾
一個部落嘅驅邪儀式

儀式入面有好多公羊嘅血

我唔喺度描述啦

但幾年後我喺盧旺達參與另一項計畫

我要同人講我喺塞內加爾嘅經歷

佢話︰「嗰度係西非，你知嗎？

我哋係喺東非，

我哋嘅儀式同佢哋嘅
喺幾方面都有好大分別，

但同時都有一啲相同嘅地方。

我話係呀

佢話佢哋同西方心理健康人員
有唔少麻煩

尤其係嗰啲喺種族屠殺之後嚟嘅人

我問︰「佢哋帶俾你咩麻煩？」

佢話︰「佢哋做啲嘢真係好好，

佢哋不但止冇帶病人曬太陽，

令病人感覺好啲，

佢哋仲冇打鼓或者播音樂，

令病人嘅血活起上嚟。

佢哋冇帶動成個社群，

佢哋冇將抑鬱症

講成係一種入侵性嘅惡靈。

佢哋反而將病人逐個帶入黑房，

由佢哋自己講返

佢哋經歷過痛苦嘅嘢。」

（笑聲）
（掌聲）

佢話 ︰「 我哋只好請佢哋離開國家。」

（笑聲）

宜家講下其他另類療法

介紹一下 Frank Russakoff

Frank Russakoff 有好嚴重嘅抑鬱症

應該話我係從來未喺
任何一個男人身上見過嘅

佢成日抑鬱

當我見佢嘅時候

佢每個月都要接受電擊治療

治療完之後嘅一個禮拜佢會覺得迷茫

之後第二個禮拜又會好返

跟著又會抑鬱

噉樣嘅話佢又要去接受電擊治療

當我見到佢，佢同我講

「我已經忍受唔到噉樣過日子，

我唔可以再繼續噉樣落去。

假如情況冇好轉，我知道點樣解決佢。」

佢又同我講︰「但係，

我聽過麻省總醫院有個療法叫做

扣帶回切開術， 係一種腦科手術，

我諗我可以試試。」

我記得當時我好開心

因為一個人已經經歷過咁多

慘痛經歷、咁多唔同嘅治療

但佢內心仲抱著一絲嘅樂觀

佢願意再試多次

佢做咗個好成功嘅手術

宜家仲係我朋友

佢有一個好老婆同兩個可愛嘅細路

佢手術之後嘅聖誕節寫咗封信俾我

佢話︰

「我老豆今年寄咗我兩份禮物，

第一份係 The Sharper Image 牌嘅
可捲動式 CD 架，

但我唔需要佢。

不過我知道佢送嚟係想

慶祝我可以獨立生活、

有自己鐘意嘅工。

另一份禮物係我婆婆嘅相，

我婆婆死於自殺。

當我拆禮物，我就喊咗出嚟，

然後我媽咪過嚟同我講︰

『你係咪未見過婆婆而喊？』

我答︰『婆婆同我都有同樣嘅病。』

我喊係因為我寫俾你。

我唔係傷心， 而係我個腦太多嘢啦。

我覺得自己會自殺，

但父母同醫生支持我。

我做咗手術，我仲生存，我好感激。

雖然有時感覺唔係活喺一個啱嘅年代，

我哋確實活喺一個啱嘅年代。」

我驚訝抑鬱症竟然

被認為係一種現代、西方、中產嘅嘢

於是我就睇下抑鬱症

喺其他唔同地方係點發生

我最感到興趣嘅係低下階層嘅抑鬱情況

所以我搵出針對窮人嘅抑鬱有乜係做咗

我發現大多數有抑鬱症嘅窮人
都冇接受過治療

抑鬱症係基因易受損嘅結果

呢種基因按理會喺
成個人口裡面平均分布

而發病情況，尤其窮人會相對嚴重

但實情係如果你有一個美好嘅生活

但一直覺得自己好淒慘

同埋問︰「點解我會有咁嘅感覺？

我應該有抑鬱啦。」

然後你去搵治療

但係如果你有一個好慘嘅人生

而你一直都覺得好慘

你慘嘅感覺同你慘嘅生活呼應

你唔會諗呢個病可以醫得好

換句話講，我哋抑鬱國家
入面嘅貧窮人口

爆發咗一種流行病叫做抑鬱症

但冇人提過佢、冇人會醫過佢

冇人重視過佢

可以話係社會悲劇

所以我搵咗一個學者

佢進行梗一個
關於華盛頓外圍貧民區嘅研究

佢揀咗求診嘅女性做對象

呢啲女性係因為其他病至求診

但後來都發現到有抑鬱

於是班人得到六星期嘅試驗性治療

Lolly 係其中一個參加嘅人

佢第一日入嚟就話佢係七個細路嘅母親

佢以前有做嘢，但佢宜家要放棄份工

「因為我出唔到間屋。

我同細路冇嘢講。

朝早， 我唔可以等住佢哋走，

我只好返上床用被遮住個頭。

三點鐘當小朋友返到屋企，

我覺得時間過得好快。

佢仲話︰ 「我一直有食開 Tylenol，

任何可以畀我瞓耐啲嘅藥物。

我丈夫一直話我又蠢又醜，

我希望痛楚可以停止。」

佢就係噉帶咗入嚟呢個試驗性嘅治療

六個月後我再同佢傾

佢已經喺一間美國海軍嘅托兒所度做

佢離開有暴力傾向嘅丈夫

佢話畀我知

佢啲細路比以前仲開心咗添

佢間新屋入面整咗一間房專門俾男仔

仲有一間房專門俾女仔

「但係夜晚細路都去晒我張床，

我哋一齊做功課同埋其他嘢。

其中一個小朋友話想做牧師，

另一個想做消防員。

有個女話想做律師。

佢哋唔似以前噉喊，同埋冇再打交。

我宜家需要嘅就只係我小朋友。

事情一直喺度改變梗，

我著衫、我對事物嘅感覺，

仲有我平時嘅態度都有唔同。

我可以行出門口而唔覺得驚。

我唔覺得以前唔好嘅感覺會返返嚟。

如果唔係 Miranda 醫生，

我可能仲要匿喺屋企用被襟著個頭。

如果我仲活著嘅話，

我會問上帝派一隻天使嚟，

令佢可以聽到我嘅禱告。」

佢嘅經驗令我非常感動

我決定將佢嘅經歷寫落嚟

唔只寫入我喺寫梗嘅一本書

仲會寫喺專欄裡面

同埋紐約時代雜誌邀請我
寫關於窮人嘅抑鬱症

我就寫咗我遇過真實嘅故事

但編輯打嚟話︰

「我哋登唔到噉樣嘅文章。」

我話點解唔得？

佢話個故事太牽強啦

「呢啲人係社會嘅最底層，

佢哋接受咗幾個月治療之後，

就可以去摩根史坦利返工？

簡直難以置信。」

佢話︰「我從來未聽過噉樣嘅嘢。」

我話你冇聽過就代表咗

呢單係一單「新」聞

（笑聲）
（掌聲）

我仲話呢個係一間新聞雜誌社嚟架

噉傾咗一輪之後

佢哋同意刊登我嘅文章

但我諗好多佢哋講嘅嘢都係好怪

同埋有偏見

佢哋覺得如果我哋去醫班窮人

就係剝削梗佢哋

原因係我哋會改變佢哋

呢啲虛偽嘅道德情操似乎無處不在

佢哋覺得抑鬱症嘅治療
藥物以至其他嘢

都係人工合成嘅、唔係自然嘅

而我覺得佢哋係非常之誤導

人隻牙脫落係正常不過嘅事

但唔會因為噉有人反對用牙膏

至少我圈子裏面嘅人冇

然後有人會話

抑鬱症唔係每個人都一定會經歷嘅嘢？

我哋唔係進化到有抑鬱症架咩？

抑鬱症唔通唔係我哋性格嘅一部分？

噉我就會話，情緒係可以改嘅

能夠有傷痛、恐懼、快樂、舒適

以及其他唔同嘅情緒

其實係非常珍貴嘅

抑鬱症係由於情緒系統崩潰

係壞嘅轉變

有啲人走嚟同我講︰

「如果我再撐多年，
我應該會走出抑鬱症。」

我一直同佢哋講︰
「你可以走得返出嚟，

但你永遠唔會再係年輕。

人生短暫， 
但你成年都喺度講想放棄。

諗下啦。」

英文入面關於抑鬱嘅字真係好少

其他語言都係噉

我哋用同一個字︰depression

去形容一個細路

喺佢生日嗰日遇到落雨時嘅感覺

同一個字會形容一個人自殺前嘅心情

有啲人同我講︰

「抑鬱係唔係平時傷心嘅延續？」

我話︰「可以係延續嘅，
抑鬱係有傷心嘅延續。」

打個比喻

你間屋出面道圍欄有一個好細嘅鏽跡

你可以磨佢然後再上漆

但如果你唔理間屋一百年

成個欄就會生鏽到剩返一堆橙色嘅鏽屑

就係開頭小小嘅生鏽我哋要去解決

所以宜家啲人話

「你食咗開心丸， 你會開心嗎？」

對於我嚟講冇

我唔會因為食晏而覺得傷心

我唔會因為我嗰電話答錄機而傷心

我唔會因為沖涼而傷心

我諗我感受到更多

因為我唔會冇嘢走去傷心

我可以因為工作上嘅失望而傷心

或者因為轉壞嘅關係，又或者全球暖化

呢啲嘢都係我宜家傷心嘅

然後我同自己講，噉又點？

有更好生活嘅人，甚至有更嚴重抑鬱

係點樣走出嚟架呢？

對抗逆境個心理機制又係點架呢？

我慢慢總結出否定過往有抑鬱嘅人

話自己好耐以前曾經抑鬱

但唔想諗返轉頭，唔再面對佢

只係想過好嘅生活

非常諷刺地

呢啲人卻係畀佢哋擁有嘅嘢控制咗

唔正視抑鬱症只會令得情況更加嚴重

當你避佢，佢反而惡化

表現比較好嘅人反而會
接受佢哋有抑鬱症

肯面對抑鬱嘅人就會更堅強

所以 Frank Russakoff 同我講︰

「如果我可以再嚟一次，

我唔會揀呢條路，

我反而會揀一個唔尋常嘅方式。

我好感激我經歷過嘅嘢。

我好開心我留過院四十次。

我留院學識咗乜係愛。

我同父母、醫生嘅關係
係以後都係最珍惜嘅。」

而 Maggie Robbins 話︰

「我以前喺一個愛滋病嘅診所做義工。

我工作嘅時候，我會唔停咁講嘢。

我對著嘅人冇乜反應，

所以我就覺得佢哋唔係好友善。」

（笑聲）

「但我之後發覺，

佢哋除咗頭五分鐘嘅傾計之外，

就唔想做其他嘢。

好似我冇愛滋病、唔使死，

但又可以接受到嗰啲人一樣，

我哋嘅需求正正係我哋最大嘅本錢。

我學識點樣放開我想要嘅嘢。」

重視抑鬱症唔擔保抑鬱症唔會復發

但會令復發嘅心理準備
同復發本身都更容易去接受

個意義唔係在於去搵抑鬱症嘅意義

或者覺得自己嘅抑鬱症好有意義

而係當抑鬱症再嚟嘅時候

雖然好似好弊

但我會從中學到嘢

由以前嘅抑鬱學到情緒可以有幾大

而又點樣可以比事實更加真實

經歷過之後，令我情緒正面嘅時候

我識得更加集中同投入咁感受正面情緒

抑鬱症嘅相反唔係快樂，係活力

而這些日子我的生命充滿活力,

就算傷心嘅時候都係

我腦入面感受到嗰場葬禮

我同一個巨人坐喺世界嘅邊緣

我發現自己內心嘅一啲嘢

以前我要呼喚內心

但直到廿年前嘅一日

地獄好似派咗使者嚟

之後我明白到所有嘢

我唔使再呼喚自己

當我唔鐘意抑鬱、唔想再抑鬱嘅時候

我搵到一個愛上抑鬱症嘅方法

我愛佢係因為佢令我去尋同埋堅持快樂

我愛佢因為我決定每日…

有時因為玩

有時因為喺嗰刻特登唱反調

去擁抱生存嘅理由

呢樣嘢可喜可賀，亦係一份榮譽

多謝

（掌聲）