我哋而家喺人類歷史嘅轉捩點

人類處於得到新星球
同失去舊星球之間

失去嘅舊星球就係我哋稱為家嘅地球

就算只係過去幾年

我哋對地球喺宇宙扮演
咩角色嘅知識都增長咗唔少

美國太空總處嘅開普勒任務

發現有成千上萬個類似地球嘅行星
圍繞住其他恆星運行

證明地球只係銀河系
數以千萬宜居行星嘅其中一個

開普勒係一台太空望遠鏡

當星體喺恆星前面經過

會輕微阻擋恆星嘅光線

令恆星睇起嚟暗啲

開普勒就係量度呢啲稍為暗淡嘅光線

開普勒嘅數據可以推算到星體嘅體積

同埋佢哋同母恆星之間嘅距離

呢兩樣都有助我哋了解星體

係唔係好似太陽系類地行星咁
體積小而且佈滿岩石

以及佢哋從母恆星吸收幾多光

縱合上述結果

我哋可以知道
呢啲星球到底適唔適宜住

但好唔好彩

喺發現可能宜居嘅星球嘅同時

我哋地球因為人類而逐漸衰退

2014 年係有紀錄以嚟最熱嘅一年

同我哋共處咗成千年嘅冰川同海冰

將會喺幾十年之內消失

呢種由我哋造成嘅地球環境改變

好快就超越我哋可以控制佢哋嘅步伐

不過我唔係氣候學家，我係天文學家

我研究星體嘅宜居性

我希望可以喺地球以外嘅宇宙入面

搵到有生命嘅地方

你可以話我搵緊外星級數嘅房地產

作為一個沉迷搜索宇宙生命嘅人

我可以話你知

你越係想搵一個似地球嘅星球

你越會珍惜我哋嘅地球

每次有新星球發現

我哋都會將新星球
同我哋最熟悉嘅星球比較

即我哋太陽系嘅行星

試想一下我哋嘅鄰居，火星
細小而且滿佈岩石

雖然佢距離太陽有啲遠

但如果火星被開普勒計劃呢類任務發現

佢可能被人分類做宜居星球

其實以前，火星的確有可能宜居

呢個亦係我哋深入研究火星嘅原因

好似好奇號咁嘅火星探測器
喺火星表面行走

尋找已知生命之源嘅線索

而好似 MAVEN 任務一樣嘅軌道探測器

就收集火星大氣層嘅樣本

畀我哋了解點解火星唔再宜居

私人太空旅行公司
依架唔只提供近太空旅行

亦可能喺將來提供火星移民服務

但呢啲火星景色
只會令人聯想起地球嘅沙漠

一個我哋聯想只有開拓者同邊疆嘅地方

同地球相比，火星嘅環境係幾可怕

諗下我哋地球尚未殖民嘅沙漠

呢啲地方比起火星更加之宜居

就算地球最乾、最高嘅地方

嗰度嘅空氣都係由幾千里外嘅雨林製造

都係甜嘅，而且充滿住氧氣

我擔心呢種殖民火星
同其他星球嘅熱潮

會引致長期唔好嘅後果

就係令某啲人相信

當我哋所知唯一宜居嘅星球
自我毀滅之後

火星就係我哋嘅救星

雖然我好鍾意星際探索

但我同時好唔贊同呢個諗法

我哋有無數個好理由去火星

但如果有人同你講
火星係人類嘅後備星球

就同鐵達尼號嘅船長同你講

陣間喺救生艇上面會搞派對一樣荒謬

（笑聲）

（掌聲）

多謝

星際探索同星球保護並唔係矛盾嘅

佢哋係同一個銀仔嘅兩面︰

都係去了解、保護同改善將來嘅生活

我哋呢個世界嘅極端環境
其實等如外星嘅美景

佢哋甚至更加近我哋屋企

如果我哋明白點樣可以

喺地球衝突、唔適宜人住嘅環境以外

創造同維持宜居空間

或者，我哋可以做到環境保護

同時又可以做到更加多

最後，我留俾大家思考費米悖論

好多年前，物理學家費米問︰

宇宙已經存在咗好長時間

而我哋相信宇宙入面有好多星球

我哋依家應該搵到外星生物嘅證據

咁佢哋喺邊？

其中一個可以解答費米悖論嘅答案係

喺外星生存嘅生物

佢哋嘅文明已經進步到
佢哋可以住喺星際之間

但佢哋睇唔到

以前一直住開、孕育佢哋文明嘅星球

有幾重要

如果覺得星際殖民已經可以拯救到人類

咁樣實在係狂妄自大

但星體保護同星際探索
反而可以同時進行

如果我哋可以將火星
呢個咁惡劣嘅星球變成宜居

咁保護我哋宜居嘅星球
應該係更加輕易至啱

多謝

（掌聲）