呢隻黑猩猩見到
一堆熟過頭嘅布冧

好多已經爛開晒

散發一陣醉人嘅果香

搞到佢忍唔住一嚿一嚿擺落口
然後開始覺得⋯⋯暈陀陀

呢隻猩猩無意中發現咗
人類最終廣泛採用嘅技術

用嚟制造啤酒、葡萄酒
同其他酒精飲品

熟咗嘅水果有大量糖分
會吸引一種叫做「酵母」嘅微生物

酵母食咗果糖之後
會產生一種叫「乙醇」嘅化合物

就係我哋飲品入面嘅酒精喇

呢個過程叫做「發酵」

冇人知道
人類幾時開始整發酵飲品

最早嘅證據
喺西元前 7000 年嘅中國

喺陶器入面嘅殘留物

透露古人用發酵咗嘅
米、黍米、提子同蜜糖整酒精飲品

喺幾千年之內

全世界好多文明
已經開始整自己嘅發酵飲品

古代美索不達米亞人同埃及人

會用儲起嘅穀物
全年無休整啤酒

而呢種啤酒
個個都有得飲

甚至會當係每日嘅配給發畀啲工人

佢哋都會整吓葡萄酒

但係因為嗰度嘅天氣唔適合種植提子

所以葡萄酒就留返畀啲貴族飲

喺適合提子生長嘅希臘同羅馬
就啱啱相反

葡萄酒就等如埃及
同美索不達米亞嘅啤酒

因為酵母可以發酵所有植物嘅糖分

種得到嘅穀物同植物
古人都會用嚟釀酒

喺南美洲啲人會用穀粒
整一種叫「奇恰」嘅酒

有時仲會加吓啲迷幻草藥

喺而家叫墨西哥嘅地方

當地人鍾意飲用仙人掌汁整嘅普逵酒

東非人就用香蕉同棕櫚葉整啤酒

而今日我哋叫日本嘅區域

佢哋用稻米整清酒

幾乎全世界所有地區
都有自己嘅發酵飲品

隨著飲酒成爲咗我哋
日常生活嘅一部分

有啲權威人士堅信
酒精有好嘅影響

古希臘醫師認為葡萄酒有益健康

而詩人就話飲啖酒先搵到靈感

有人開始擔心
啲人會濫用酒精

希臘哲學家提倡
飲酒要識得節制

喺早期歐洲嘅猶太教和基督教作家

會將葡萄酒納入儀式嘅一部分

但佢哋認為劈到冧係罪嚟嘅

喺而中東，非洲同西班牙

有條伊斯蘭教條
唔畀人醉住祈禱

慢慢仲變埋
連飲酒都唔畀

古代嘅發酵飲品
酒精含量比較低

因為喺酒精濃度到咗13%嘅時候

野生酵母會產生有毒嘅副產物

殺返啲酵母轉頭

酵母死晒之後就唔會再發酵
酒精濃度就停咗喺呢個位

所以喺頭幾千年釀嘅酒
酒精含量都喺有限嘅

但係「蒸餾法」改變咗呢個定律

喺九世紀嘅阿拉伯文獻入面
記載咗將發酵液加熱到沸騰

蒸發裡面啲酒精

酒精嘅沸點低過水
所以佢會變咗做蒸氣先

然後再將呢啲蒸氣收集、冷卻

就變咗做蒸餾酒

酒精濃度高過晒所有發酵整嘅酒

一開頭，呢種高濃度嘅
酒精係用喺醫療用途

跟住，烈酒變咗做重要的嘅交易貨物

因為唔似啤酒、葡萄酒
烈酒唔會變質

喺加勒比海地區嘅歐洲殖民地
當地人用收成嘅糖整冧酒

變成水手嘅主要飲品
仲賣埋去北美

歐洲人將白蘭地同氈酒帶咗去非洲

用酒嚟交換奴隸、土地
同棕櫚油、橡膠之類嘅原材料

喺呢啲地區
烈酒就等如銀兩

喺大航海時代

烈酒喺遠距離航海入面
就扮演咗重要嘅角色

由歐洲搭船去亞洲東部
同美洲差唔多要幾個月

點樣保存食水
就係最大嘅挑戰

佢哋發現喺裝水嘅大桶
入面加啲白蘭地

就可以延長食水保鮮期

因爲酒精係一種防腐劑
可以殺死有害嘅微生物

由 17 世紀到而家

酒精已經由最初
搞到動物暈陀陀嘅嘢飲

演變成殖民貿易嘅王牌

至於後果⋯⋯就唔講住喇

隨著時代變遷，酒喺人類社會中
扮演嘅角色只會越嚟越複雜