OTP Learning Series 05: Lonxitude dos subtítulos e velocidade de lectura

Este titorial explica como usar a caixa de información de subtítulos de Amara para traballar coa lonxitude dos subtítulos e a velocidade de lectura. As ligazóns empregadas neste vídeo son:
http://translations.ted.org/wiki/How_to_break_lines
http://translations.ted.org/wiki/How_to_Compress_Subtitles

Este vídeo elaborouse para o persoal voluntario que traballa no Open Translation Project de TED. Este proxecto leva as charlas TED alén do mundo angloparlante ofrecendo subtítulos, transcricións interactivas e a posibilidade de que calquera charla sexa traducida por persoal voluntario de todo o mundo. Máis información en http://www.ted.com/pages/287

Falemos da nova caixa de información
de subtítulos de Amara

e de como pode serlles útil
a transcritores e tradutores.

Cada vez que preman
nun subtítulo para editalo,

verán aparecer esta caixa.

Fíxese que comeza
con datos de minutaxe,

pero agora centrareime
na outra información do cadro,

no número de caracteres do subtítulo

e no número de caracteres por segundo.

Primeiro falemos do...

42.

Nas linguas con alfabeto latino,

se un subtítulo ten máis de 42 caracteres

debe quebrarse en 2 liñas.

Isto fai o subtítulo máis doado de ler

e evita visualizacións estrañas
en reprodutores “offline”.

A nova caixa de información amosa
tanto a largura total do subtítulo

como a cantidade de caracteres
das dúas liñas.

Cando a largura total do subtítulo
da caixa supera os 42 caracteres,

significa que se debe quebrar o subtítulo,

pero tamén que debe pensarse como facelo.

Loxicamente, non queremos ter
unha liña de 42 caracteres

e a seguir outra liña de 1 carácter.

Por iso, quebre a liña de forma que
as dúas partes teñan unha largura similar.

Velaquí un exemplo.

Este subtítulo ten 51 caracteres.

Pode partirse así,

cunha liña de 14
e outra de 36 caracteres,

pero será máis fácil de ler
se as liñas están máis equilibradas,

como aquí, cunha liña de 27 caracteres
e a segunda con 23.

Ao quebrar subtítulos en liñas,

trate de conservar xuntas
as unidades sintácticas.

Isto implica que temos que evitar
partir unha secuencia

que forma unha unidade lingüística.

Por exemplo, en inglés,

débense manter unidos
artigo e substantivo,

o adxectivo co substantivo
ao que modifica,

e a preposición co elemento
ao que se refire.

Poden atopar máis información
sobre as quebras de liña na OTPedia,

no artigo "How to break lines".

Vaiamos á outra cousa que podemos aprender
da caixa de información de subtítulos.

O número de caracteres por segundo,

tamén chamado...

velocidade de lectura.

Despois de todo, non se trata só
do longo que é un subtítulo,

senón tamén de canto permanece na pantalla

e do tempo que unha persoa ten para lelo.

A velocidade ideal de lectura
para linguas de alfabeto latino

é de 15 a 21 caracteres por segundo.

Pero de onde sae ese número
e por que é importante?

Ben, a velocidade de lectura dille
o longo que pode ser un subtítulo.

Por exemplo, se temos
un subtítulo de 40 caracteres

que aparece 2 segundos,

quen le só ten que ler
20 caracteres por segundo.

Iso é doado de facer,

así que 40 caracteres
estaría ben nese caso.

Pero se o mesmo subtítulo
só está en pantalla 1 segundo,

o espectador precisaría ler
40 caracteres por segundo,

algo imposible para a maioría de nós,

o que significaría que o subtítulo
debe acurtarse.

Por sorte, vostede non ten
que calcular todo iso

porque a caixa de información de Amara

xa o fai por nós.

Imos cun exemplo da importancia de manter
unha velocidade de lectura adecuada.

Neste breve corte da charla
de Dragana Marjanović, de TEDxNoviSad,

a velocidade de lectura supera
os 21 caracteres por segundo.

O que pasou xusto despois
de que o noso proxecto cumprise un ano

foi que me premiaron co meu primeiro
gran proxecto arquitectónico,

que consistiu en enxesar toda a superficie
dunha bela escaleira de 4 tramos

que estaba situada nun bonito edificio

da famosa cidade de Grenoble, en Francia.

Para min, isto supuxo un longo período
de 4 meses de traballo práctico

principalmente en Francia,
pero tamén en Bulgaria

e, ao terminar, retomei os estudos.

Esta vez, foi a arquitectura na terra
de España e Portugal.

Cando ao fin puiden volver á casa, empecei
de inmediato o meu proxecto de graduación

sobre a arquitectura en terra
da Provincia Autónoma de Vojvodina.

Alguén lembra o que pasou en Bulgaria?

E onde estaba o fermoso edificio?

No corte previo, modifiquei
os subtítulos en inglés,

creados por Tatjana Jevdjic
e revisados por Ivana Korom,

e alongueinos, con velocidades de lectura
moi superiores ás cómodas.

Este é o mesmo corte cos
subtítulos orixinais,

coa velocidade perfecta
de 21 caracteres por segundo como máximo.

Despois do primeiro ano, conseguimos
o primeiro gran traballo:

enxesar a escaleira de 4 tramos
dun edificio de Grenoble,

despois diso, fixen
unhas prácticas de 4 meses

parte en Francia, parte en Bulgaria,

e logo estudei a arquitectura en terra
de España e Portugal.

Regresei á casa e empecei
un proxecto de graduación

sobre a arquitectura
en terra de Vojvodina.

Moito máis fácil de seguir, non si?

O problema da velocidade de lectura

é que ademais de ler os subtítulos,

a persoa que le ten
que captar outra información,

como a linguaxe corporal do orador
e a súa entoación,

e os contidos en pantalla,
como diapositivas e imaxes.

E pode ser difícil seguir
os propios subtítulos

se estes desaparecen moi á présa.

Sobre todo se o espectador
non entende o idioma do vídeo

abondo para axudarlle
a entender o que está pasando.

Por sorte, esta nova caixa de información
en Amara

axúdalle a ver se a velocidade supera
os 21 caracteres por segundo

e indícalle onde pode axudarlle
ao espectador a seguir a charla.

Para corrixir a velocidade de lectura

algúns usuarios avanzados axustan
a minutaxe dos subtítulos,

pero en case todos os casos
a ferramenta principal será...

a compresión.

Isto é, tentar expresar a mesma idea
nun subtítulo máis curto.

Por exemplo, unha tradución case literal

"Entón, audiencia, o que querería darlles
aquí e agora é outro exemplo,"

con 70 caracteres,

pode cambiarse por...

"Gustaríame darlles outro exemplo,"

reducíndoa a 37 caracteres,

o que implica que o espectador poderá lela

antes de que desapareza da pantalla.

Tratar de atopar o modo
de comprimir subtítulos é divertido,

e a nova interface axúdalle

indicándolle cando é necesario comprimir,

pero tamén cando non o é.

Pode aprender máis
sobre compresión de subtítulos

e atopar estratexias de compresión
e exemplos

na guía da OTPedia

titulada "How to compress subtitles".

Anímese a explorar a nova interface

e as súas novas e útiles ferramentas.

E agora,
felices transcricións e traducións!